IND vs ENG 5th Test : कसोटी क्रिकेटच्या इतिहासात असं दुसऱ्यांदाच होणार, अश्विन-बेअरस्टोमुळं अनोखा योगायोग

IND vs ENG 5th Test Ravichandran Ashwin Jonny Bairstow 100th Test Match : भारत आणि इंग्लंड यांच्यातील पाचवा कसोटी सामना 7 मार्चपासून धरमशाला येथे सुरू होत आहे. मालिकेत भारताने 3-1 अशी विजयी आघाडी घेतली आहे. जरी मालिकेचा विजेता ठरला असला तरी हा कसोटी सामना दोन्ही संघासाठी खास आहे. कारण दोन्ही संघातील एक एक खेळाडू हे त्यांचा 100 वा कसोटी सामना खेळणार आहेत.

भारताचा रविचंद्रन अश्विन आणि इंग्लंडचा जॉनी बेअरस्टो हे दोघेही आपला 100 वा कसोटी सामना धरमशाला येथे खेळणार आहे. क्रिकेटच्या इतिहासात एकाचवेळी वेगवेगळ्या संघातील दोन खेळाडू आपला 100 वा कसोटी सामना खेळण्याची ही फक्त दुसरी वेळ आहे. यापूर्वी 2013 मध्ये इंग्लंड आणि ऑस्ट्रेलिया सामन्यात अॅशेस मालिकेत एलिस्टर कूक आणि मायकल क्लार्क या दोन वेगवेगळ्या संघातील खेळाडूंनी एकाचवेळी आपला 100 वा कसोटी सामना खेळला होता.

दक्षिण आफ्रिकेचा जॅक कॅलिस, शॉन पोलॉक आणि न्यूझीलंडचा स्टीफन फ्लेमिंग यांनी 2006 मध्ये सेच्युरियनमध्ये आपला 100 वा कसोटी सामना खेळला होता. क्रिकेट इतिहासात एकाच सामन्यात तीन खेळाडूंनी आपला 100 वा कसोटी सामना खेळण्याची ही पहिली आणि एकमेव वेळ होती.

त्यानंतर वेस्ट इंडीज आणि इंग्लंड यांच्यातील कसोटी सामन्यात इंग्लंडचे दोन खेळाडू आपला 100 वा कसोटी सामना खेळण्याचा योग आला होता. ओल्ड ट्रॅफर्डमध्ये खेळला गेलेल्या या सामन्यात इंग्लंडचा माजी कर्णधार माईकल एथर्टन आणि एलेक स्टीवर्ट यांनी हा माईलस्टोन पार केला होता.

(Cricket Latest Marathi News)