अजून तीन भोपळे मग 'भोपळ्यांची' गादी सचिनकडून विराटकडे येणार

पार्ल : भारताचा स्टार फलंदाज विराट कोहली (Virat Kohli) बॅड पॅचमध्ये आहे की नाही हा एक संशोधनाचा विषय झाला आहे. तो कधी सेट होऊन बाद होतो तर कधी भोपळाही न फोडता माघारी जातो. भारत आणि दक्षिण आफ्रिका (India vs South Africa) यांच्यातील दुसरा एकदिवसीय सामना भारतासाठी मालिका वाचवण्याच्या दृष्टीने अत्यंत महत्वाचा आहे. मात्र याच सामन्यात भारताचा महत्वाचा फलंदाज विराट कोहली भोपळाही न फोडता माघारी गेला. (Virat Kohli Out On Duck)

विशेष म्हणजे या भोपळ्याबरोबरच विराट कोहली एका विक्रमाच्या दिशेने आगेकूच करत आहे. तीनही क्रिकेट प्रकारात सर्वाधिकवेळा भोपळाही न फोडता बाद होण्याचा हा विक्रम आहे. भारताकडून सर्वाधिकवेळा भोपळाही न फोडता माघारी जाण्याचा विक्रम सचिन तेंडुलकरच्या (Sachin Tendulkar) नावावर आहे. तो ३४ वेळा शून्यावर बाद झाला होता. यानंतर विरेंद्र सेहवाग आणि आता विराट कोहली हे दोघे संयुक्तरित्या या यादीत दुसऱ्या स्थानावर आहेत. हे दोघेही ३१ वेळा शून्यावर बाद झाले आहेत.

२९ वेळा बदक मिळालेला सौरभ गांगुली (Sourav Ganguly) या यादीत तिसऱ्या स्थानावर आहे. तर युवराज सिंग २६ भोपळे घेऊन चौथ्या स्थानावर आहे. जर विराट कोहलीचा भोपळे न फोडण्याचा पराक्रम असाच सुरू राहिला तर तो लवकरच सचिन तेंडुलकरची जागा घेईल हे नक्की. कारण सचिनच्या शतकांच्या शतकाचा विक्रम मोडण्यासाठी विराटला अजून ३० शतके करायची आहेत. तर शून्यावर बाद होण्यात सचिनला मागे टाकण्यासाठी विराटला फक्त तीन भोपळ्यांची गरज आहे. (Virat Kohli will Break Sachin Tendulkar Record)