IPL 2024, CSK vs GT: अजिंक्य रहाणेने सूर मारत पकडला मिलरचा 'किलर' झेल, Video होतोय व्हायरल

Ajinkya Rahane Catch: चेन्नई सुपर किंग्सने मंगळवारी (26 मार्च) गुजरात टायन्सविरुद्ध आयपीएल 2024 स्पर्धेच्या सातव्या सामन्यात 63 धावांनी विजय मिळवला. चेन्नईच्या विजयात क्षेत्ररक्षणाचेही महत्त्वाचे योगदान राहिले. त्यातही अजिंक्य रहाणेने घेतलेल्या झेलने सर्वांची वाहवा मिळवली.

या सामन्यात चेन्नईने गुजरातसमोर 207 धावांचे आव्हान ठेवले होते. या आव्हानाचा पाठलाग करताना गुजरातने 55 धावांत 5 विकेट्स गमावल्या होत्या. परंतु, त्यानंतर डेव्हिड मिलर आणि साई सुदर्शन यांनी डाव सावरण्याचा प्रयत्न केला.

त्यांनी गुजरातला 90 धावांचा टप्पा पार करून दिला होता. पण याचवेळी 12 व्या षटकात तुषार देशपांडे गोलंदाजीला आला. त्याने पाचवा चेंडू लेग स्टंपला टाकला, त्यावर मिलरने जोरदार फ्लिक शॉट मारला.

त्याचवेळी रहाणेने डीप मिड - विकेटला पळत येत सूर मारून दोन हातांनी अफलातून झेल घेतला. त्यामुळे मिलर 16 चेंडूत 21 धावांवर बाद झाला. यानंतर मात्र गुजरातला पुनरागमन करणे कठीण झाले. गुजरातला 20 षटकात 8 बाद 143 धावा करता आल्या.

गुजरातकडून साई सुदर्शनने सर्वाधिक 37 धावांची खेळी केली. तसेच वृद्धिमान साहानेही २१ धावा केल्या. परंतु, बाकी कोणाला फार काही करता आले नाही. चेन्नईकडून गोलंदाजी करताना दीपक चाहर, मुस्तफिजूर रेहमान आणि तुषार देशपांडे यांनी प्रत्येकी 2 विकेट्स घेतल्या.

या डावात रहाणेव्यतिरिक्त एमएस धोनीने यष्टीरक्षण करताना विजय शंकरचा अफलातून झेल घेतला. तसेच रचिन रविंद्रनेही या सामन्यात तीन झेल घेतले. त्याने अझमतुल्ला ओमरझाई, राहुल तेवतिया आणि राशिद खान यांचे झेल घेतले.

तत्पूर्वी प्रथम फलंदाजी करणाऱ्या चेन्नई सुपर किंग्सकडून शिवम दुबेने 23 चेंडूत सर्वाधिक 51 धावांची खेळी केली. याशिवाय रचिन रविंद्रने 20 चेंडूत 46 आणि कर्णधार ऋतुराज गायकवाडने 36 चेंडूत 46 धावांची खेळी केली. त्यामुळे चेन्नईला 20 षटकात 6 बाद 206 धावा करता आल्या. गुजरातकडून राशिद खानने सर्वाधिक 2 विकेट्स घेतल्या.