Ambati Rayudu RCB : सीएसके आरसीबीला त्यांची एक ट्रॉफी देऊ शकते जेणेकरून ते... रायुडू असं का म्हणाला?

Ambati Rayudu RCB IPL 2024 : आयपीएलच्या 17 व्या हंगामाच्या एलिमिनेटर सामन्यात राजस्थान रॉयल्सने आरसीबीचा 4 विकेट्स राखून पराभव केला. या पराभवानंतर आरसीबीचे पुन्हा एकदा आयपीएल जिंकण्याचे स्वप्न भंगले आहे. आरसीबीने सलग सहा सामने जिंकून प्ले ऑफ गाठली होती.

ग्रुप स्टेजच्या शेवटच्या सामन्यात आरसीबीने सीएसकेचा 27 धावांनी पराभव केला होता. हा सामना आरसीबीला 18 धावांनी जिंकणे गरजेचे होते. तरच ते प्ले ऑफसाठी पात्र होणार होते. आरसीबीने चेन्नईचा पराभव केल्यानंतर आरसीबीच्या चाहत्यांनी अन् खेळाडूंनी जोरदार सेलिब्रेशन केलं होतं.

दरम्यान, एलिमिनेटर सामन्यात राजस्थानकडून पराभूत झालेल्या आरसीबीच्या चाहत्यांवर अंबाती रायुडूने बोचरी टीका केली आहे. स्टार स्पोर्ट्सवरील कार्यक्रमात बोलताना रायुडू म्हणाला की, 'जर तुम्ही आरसीबीबाबत बोलत असाल तर फक्त पॅशन आणि सेलिब्रेशन असून तुम्ही ट्रॉफी जिंकू शकत नाही. ट्रॉफी जिंकायला तुम्हाला प्लॅनिंग करावं लागेल.'

'तुम्हाला जिंकण्याची भूक असायला हवी. तुम्ही फक्त चेन्नईला हरवून आयपीएल ट्रॉफी जिंकाल असा विचार करू नका. आता तुम्हाला पुढच्या वर्षी पुन्हा प्रयत्न करावा लागणार आहे.'

अंबाती रायुडू सीएसके आणि आरसीबी सामन्यावेळी काय झालं याबद्दल देखील बोलला. तो म्हणाला की, 'आरसीबीने सीएसकेला मात दिल्यावर ते ट्रॉफी जिंकल्यासारखे सेलिब्रेशन करत होते. बंगळुरूचा प्रत्येक रस्ता हा आरसीबी चाहत्यांनी भरला होता. आता सीएसके आपली एक ट्रॉफी आरसीबीला देऊ शकते. जेणेकरून ते त्याची मिरवणूक काढतील.'

(IPL 2024 Marathi News)