इंडियन प्रीमियर लीग २०२५ स्पर्धेत मुंबई इंडियन्सचे आव्हान रविवारी (१ जून) संपले. यंदा मुंबई इंडियन्सने त्यांच्या पुनरागमनाने ही स्पर्धा गाजवली होती. सुरुवातीच्या ५ सामन्यात एक विजय मिळवल्यानंतर मुंबईने सलग ६ सामने जिंकले. त्यांनी १४ सामन्यात ८ सामने जिंकून प्लेऑफमध्ये धडक मारली होती.
मुंबईने एलिमिनेटर सामन्यात गुजरात टायटन्सला पराभूत करत क्वालिफायर २ सामन्यात प्रवेश केला होता. पण रविवारी क्वालिफायर २ सामन्यात मुंबई इंडियन्सला अहमदाबादमधील नरेंद्र मोदी स्टेडियमवर पंजाब किंग्सने पराभवाचा धक्का दिला. या पराभवामुळे मुंबई इंडियन्स स्पर्धेतून बाहेर झाले.
