इंडियन प्रीमियर लीग २०२५ स्पर्धा २२ मार्चपासून सुरू होत आहे. पहिलाच सामना गतविजेते कोलकाता नाईट रायडर्स विरुद्ध रॉयल चॅलेंजर्स बंगळुरू संघात कोलकातामध्ये खेळवला जाणार आहे. यंदा हे दोन्ही संघ नव्या कर्णधारांच्या नेतृत्वात खेळताना दिसणार आहेत. बंगळुरू संघ हा नेहमीच चर्चेत राहणाराही संघ आहे.
पहिल्या हंगामापासून आत्तापर्यंत सर्व हंगाम बंगळुरूने खेळले आहेत. परंतु, त्यांना विजेतेपद मिळवता आलेलं नाही. तीनदा त्यांना अंतिम सामन्यात जाऊन उपविजेतेपदावर समाधान मानावे लागले आहे.
आता पुन्हा एकदा बंगळुरू नव्या कर्णधाराच्या नेतृत्वात नशीब आजमवणार आहेत. बंगळुरूने रजत पाटिदारकडे नेतृत्वाची धूरा सोपवली आहे. याशिवाय संघात मोठे बदलही झाले आहेत. गेल्यावर्षी संघात असलेले बरेच खेळाडू यंदा संघात नाही.
बंगळुरू संघाने विराट कोहली, रजत पाटीदार आणि यश दयाल या तिघांनाच रिटेन केलं होतं. तसेच स्वप्नील सिंगला त्यांनी आरटीएम वापरून संघात परत घेतले आहे. या चौघांव्यतिरिक्त बाकी संघ नवा आहे. त्यामुळे पाटिदारसमोर नव्या संघासह पुढे जाण्याचं आव्हान असणार आहे.
