IPL 2024: दोन विजयांनंतर लखनऊला तगडा झटका! 6 कोटींचा खेळाडू संपूर्ण हंगामातून बाहेर, Video शेअर करत दिली माहिती

Lucknow Super Giants News: इंडियन सुपर लीग 2024 स्पर्धेत लखनऊ सुपर जायंट्सने मंगळवारी (2 एप्रिल) रॉयल चॅलेंजर्स बेंगळरुविरुद्ध 28 धावांनी विजय मिळवला. हा लखनऊचा सलग दुसरा विजय ठरला. मात्र या विजयानंतर लखनऊला मोठा धक्का बसला आहे.

लखनऊचा 25 वर्षीय वेगवान गोलंदाज शिवम मावी आयपीएलच्या 17 व्या हंगामातून बाहेर झाला आहे.

दरम्यान, त्याला कोणती दुखापत झाली आहे, याबद्दल माहिती देण्यात आलेली नाही. मात्र, लखनऊने सोशल मीडियावर शेअर केलेल्या व्हिडिओमध्ये मावीने त्याला दुखापतीमुळे या आयपीएल हंगामातून बाहेर पडावे लागल्याचे सांगितले आहे.

व्हिडिओमध्ये मावीने सांगितले, 'मी स्पर्धा खूप मीस करेल. मी इथे दुखापतीनंतर आलो होतो आणि विचार केला होता. की मी संघासाठी सामने खेळेल आणि चांगली कामगिरी करेल. पण दुर्दैवाने मला ही स्पर्धा सध्या सोजावी लागत आहे कारण मला दुखापत झाली आहे.'

'एक क्रिकेटपटू म्हणून अशा परिस्थितीसाठी मानसिक कणखरता असावी लागते. जर तुम्हाला दुखापत असेल, तर तुम्ही पुनरागमन कसे करू शकता, याचा विचार करावा लागतो. तुम्हाला कशाची काळजी घ्यावी लागेल, हे पाहावे लागते.आपला खूप चांगला संघ असून मी संघाला चिअर करत राहिल.'

मावीला आयपीएल 2024 च्या आयपीएल लिलावात लखनऊने 6.40 कोटींना खरेदी केले होते. दरम्यान, तो लखनऊने खेळलेल्या पहिल्या तिन्ही सामन्यात खेळला नव्हता. आता तो संपूर्ण हंगामातूनच बाहेर झाला आहे.

मावीने आयपीएलमध्ये 2018 साली पदार्पण केले होते. त्याने आत्तापर्यंत आयपीएलमध्ये 32 सामने खेळले असून 30 विकेट्स घेतल्या आहेत.

दरम्यान, मावीच्या बदली खेळाडूची घोषणा अद्याप लखनऊने केलेली नाही. सध्या लखनऊ संघात मॅट हेन्री, शामर जोसेफ, मोहसिन खान, नवीन-उल-हक, मयंक यादव, यश ठाकूर, अर्शद खान आणि युधवीर सिंग हे वेगवान गोलंदाजीसाठी पर्याय आहेत.