RR vs GT IPL 2024 : एका वाईड बॉलवरून सामन्यात झाला राडा! थर्ड अंपायरने अचानक मारली पलटी

Shubman Gill furious as Third Umpire RR vs GT IPL 2024 : आयपीएलमध्ये पंचांच्या निर्णयावर अनेकवेळा गदारोळ झाला आहे. आज बुधवारी राजस्थान रॉयल्स आणि गुजरात टायटन्स यांच्यात झालेल्या सामन्यातही असेच काहीसे पाहायला मिळाले. यादरम्यान थर्ड अंपायरच्या निर्णयावरून मोठा गदारोळ झाला. ही घटना राजस्थान रॉयल्सच्या 17 व्या षटकात घडली.

त्याचं झालं असं की, सामन्याच्या १७व्या ओव्हरचा शेवटचा चेंडू मोहित शर्मा टाकायला आला. त्याने स्लो बॉल टाकताच तो ऑफ स्टंपपासून लांब होता. इकडे स्ट्राईकवर असलेल्या संजू सॅमसनने शॉट मारण्याचा पर्यंत केला. मात्र तो हुकला आणि यानंतर अंपायरने वाइड बॉल दिला.

पंचांच्या या निर्णयानंतर शुभमन गिलने रिव्यू घेतला. थर्ड अंपायर अनंतपद्मनाभन यांनी आधी फेअर डिलिव्हरी दिली. मैदानावरील अंपायरनेही आपला वाइड सिग्नल मागे घेतला. पण तितक्यात तिसरा अंपायरने पुन्हा एकदा रिव्यू पाहिला आणि यावेळी तो म्हणाला की हा बॉल वाइड आहे.

थर्ड अंपायरच्या या निर्णयाने त्यानंतर मैदानावर खळबळ उडाली. गुजरात टायटन्सचा कर्णधार शुभमन गिल चांगलाच संतापलेला दिसला. त्याने मैदानावरील पंचांशी देखील या विषयावर चर्चा केली, परंतु त्याचा काही उपयोग झाला नाही आणि त्याने आपला रिव्ह्यू गमावला.