MS Dhoni: जडेजाच्या यु-टर्नमागे कॅप्टनकूलचंच डोकं, 'त्या' संभाषणाबाबत तुषार देशपांडेचा खुलासा

MS Dhoni - Ravindra Jadeja : इंडियन प्रीमियर लीग 2024 मधील 22 व्या सामन्यात चेन्नई सुपर किंग्सने कोलकाता नाईट रायडर्स विरुद्ध 7 विकेट्सने विजय मिळवला होता. एमए चिदंबरम (चेपॉक) स्टेडियमवर झालेल्या या सामन्यानंतर एक व्हिडिओ तुफान व्हायरल झाला होता.

या व्हायरल झालेल्या व्हिडिओमागील खरी कहाणी चेन्नईचा वेगवान गोलंदाज तुषार देशपांडेने सांगितली आहे.

दरम्यान, व्हायरल झालेल्या व्हिडिओमध्ये दिसते की कोलकाताने दिलेल्या 138 धावांच्या आव्हानाचा पाठलाग करताना चेन्नईला 3 धावांची गरज असताना धोनी पाचव्या क्रमांकावर फलंदाजीला उतरला.

पण त्याआधी धोनी पायऱ्यांवरून खाली येण्यापूर्वी रविंद्र जडेजाने बॅटवैगरे घेऊन मैदानात फलंदाजीला जात असल्याचे नाटक केले. तो काही पावले पुढे गेला आणि लगेचच मागे फिरला, त्यानंतर धोनी ड्रेसिंग रुममधून खाली आला आणि मैदानात फलंदाजीसाठी गेला.

दरम्यान, जडेजाने प्रेक्षकांबरोबर केलेल्या थट्टेमुळे चेन्नईच्या डगआऊटमध्येही हस्याचा फवारा उडाला. दरम्यान, ही थट्टा पूर्वनियोजित असल्याचा खुलासा देशपांडेने केला आहे.

आयपीएलने शेअर केलेल्या एका व्हिडिओमध्ये देशपांडेने सांगितले की 'त्याने (धोनीने) जड्डू भाईला सांगितले होते, तू फक्त बाहेर जा, पण नंतर मी फलंदाजीला जाईल. मी (देशपांडेने) त्यांचं हे संभाषण ऐकलं होतं.'

त्यानंतर जडेजाने सांगितलं की प्रेक्षकांना धोनीची फलंदाजी पाहायची होती. तो म्हणाला, 'त्याने फक्त आपली एक झलक दाखवली, तर त्यांचे पैसे वसूल होऊन जातील.'

यानंतर जडेजा आणि तुषार यांनी कोलकाताविरुद्धच्या सामन्यातील कामगिरीबाबत आपली प्रतिक्रिया या व्हिडिओमध्ये दिली.

कोलकाताविरुद्ध जडेजा आणि तुषार यांनी कामगिरी खूप महत्त्वाची ठरली. या दोघांनीही गोलंदाजीत केलल्या शानदार कामगिरीमुळे कोलकाताला 20 षटकात 9 बाद 137 धावाच करता आल्या.

जडेजाने 4 षटकात अवघ्या 18 धावा देत 3 विकेट्स घेतल्या. तसेच तुषारने 4 षटकात 33 धावा देत ३ विकेट्स घेतल्या.

त्यानंतर 138 धावांच्या आव्हानाचा पाठलाग चेन्नईने 17.4 षटकात 3 विकेट्स गमावत पूर्ण केला. चेन्नईकडून कर्णधार ऋतुराज गायकवाडने सर्वाधिक नाबाद 67 धावांची खेळी केली. यावेळी त्याच्यासह एक धाव करून धोनी नाबाद राहिला.