केएसए चषक : ‘संध्यामठ’चा मंगळवार पेठ क्‍लबवर विजय

कोल्हापूर - छत्रपती शाहू स्टेडियमवर सुरू असलेल्या केएसए चषक वरिष्ठ गट साखळी फुटबॉल स्पर्धेत बालगोपाल तालीम मंडळ विरुद्ध फुलेवाडी फुटबॉल क्रीडा मंडळ यांच्यातील सामना आज १-१ ने बरोबरीत राहिला. तर दुसऱ्या सामन्यात संध्यामठ तरुण मंडळाने मंगळवार पेठ फुटबॉल क्‍लबला १-० ने पराभूत केले. 

बालगोपाल विरुद्ध फुलेवाडी यांच्यातील सामन्यात चढाया-प्रतिचढाया पाहायला मिळाल्या. बालगोपालकडून वैभव राऊत, रोहित कुरणे, ऋतुराज पाटील, अभिनव साळोखे यांच्या चढायांना फुलेवाडीच्या बचावफळीने वेळीच रोखले. 

पंधरा मिनिटांच्या सामन्यानंतर बालगोपालने फुलेवाडीच्या गोलक्षेत्रात केलेली चढाई ‘बालगोपाल’च्या पथ्यावर पडली. त्यांच्या खेळाडूने टोलवलेला चेंडू ‘फुलेवाडी’च्या खेळाडूने हाताळला. बालगोपालला पेनल्टी किक बहाल करण्यात आली. त्यावर ऋतुराज पाटीलने १८ व्या मिनिटाला गोल नोंदवून संघाला आघाडी मिळवून दिली. 

या गोलची परतफेड ‘फुलेवाडी’कडून प्रतीक सावंतच्या पासवर राजू दासने ५३ व्या मिनिटाला केली. ‘फुलेवाडी’कडून राजू दास, मिशेल, रोहित मंडलिक, अक्षय मंडलिक, अरबाज पेंढारी यांच्या चढायांना ‘बालगोपाल’च्या खेळाडूंनी दाद दिली नाही. ‘बालगोपाल’च्या खेळाडूंनी शॉर्ट पासचा वापर करत ‘फुलेवाडी’ची बचावफळी भेदण्याचा सातत्याने प्रयत्न केला. 

संध्यामठ विरुद्ध मंगळवार पेठ यांच्यातील सामना पूर्वार्धात गोलशून्य बरोबरीत राहिला. उत्तरार्धात संध्यामठकडून अभिजित सुतारने ४४ व्या मिनिटाला गोल केला. त्यांच्या अभिजित सुतार, योगेश सरनाईक, अमन मोरे, शिवम पोवार, आशिष पाटीलने चांगल्या चढाया केल्या. मंगळवार पेठेकडून आकाश मायणे, आदर्श पोवार, सौरव जाधव, ऋषिकेश पाटील यांनी एकमेकांना पास देत संध्यामठच्या खेळाडूंना झुलविण्याचा प्रयत्न केला. 

संध्यामठच्या अनुभवी खेळाडूंनी त्यांच्या चढाया वेळीत रोखून खेळ संथ करण्यावर भर दिला. सामन्याच्या अखेरपर्यंत मंगळवार पेठेचे खेळाडू गोल फेडण्याच्या तयारीत होते. ती संधी संध्यामठच्या खेळाडूंनी त्यांना मिळू दिली नाही.  

संबंधित बातम्या

केएसए चषकः शिवाजी तरुण मंडळाची दिलबहार (अ) वर मात 

केएसए चषक : प्रॅक्टिस क्लब (अ) चा खंडोबा तालीम (अ) वर विजय 

कोल्हापूर : ऋणमुक्तेश्‍वर तालीम मंडळाचा संध्यामठ संघावर विजय 

कोल्हापूर : प्रॅक्‍टीस क्लबकडून संयुक्त जुना बुधवारचा धुव्वा 

कोल्हापूर : पाटाकडील तालीम मंडळ अ, पोलिस संघ विजयी