Neeraj Chopra : गोल्डन बॉय नीरज चोप्राचा आणखी एक पराक्रम, महान धावपटू उसेन बोल्टला टाकलं मागे

Neeraj Chopra : ऑलिम्पिक चॅम्पियन नीरज चोप्राने टोकियो गेम्समध्ये ऐतिहासिक सुवर्णपदक जिंकल्यानंतर दिग्गज उसेन बोल्टला 'सर्वात दृश्यमान अॅथलीट' म्हणून मागे टाकले आहे, असे जागतिक अॅथलेटिक्सच्या अभ्यासात दिसून आले आहे. भारताच्या 24 वर्षीय स्टार खेळाडूने वर्ल्ड चॅम्पियनशिपमध्ये रौप्य पदक जिंकून आपली कीर्ती आणखी वाढवली आहे.

मीडिया कव्हरेजचा विचार करता, नीरज चोप्रांवर 812 लेख प्रकाशित झाले आहेत. त्यांच्यापाठोपाठ इलेन थॉम्पसन-हेरा (751), शेली-अॅन फ्रेझर-प्रायस (698) आणि शेरीका जॅक्सन (679) हे त्रिकुट दुसऱ्या तिसऱ्या चौथ्या क्रमांकावर आहे. करिश्माई बोल्ट 574 लेखांसह या यादीत पाचव्या स्थानावर आहे. जमैकाचा अॅथलीट आता निवृत्त झाला आहे, पण वर्षानुवर्षे अॅथलीटच्या या वार्षिक यादीत तो अव्वल स्थानावर होता.

नीरज चोप्रा या वर्षी डायमंड लीग फायनल जिंकणारा भारतातील पहिला अॅथलीट बनला आहे. भालाफेक स्टारने या वर्षाच्या सुरुवातीला स्टॉकहोम डायमंड लीगमध्ये 89.94 मीटरचा वैयक्तिक सर्वोत्तम थ्रोही केला होता. हा फेक सध्याचा राष्ट्रीय विक्रमही आहे. दुखापतीमुळे नीरज 2022 मध्ये बर्मिंगहॅम येथे होणाऱ्या राष्ट्रकुलमध्ये सहभागी होऊ शकला नाही.