Sl vs Aus Test: श्रीलंकेच्या विजयात चंडिमल, जयसूर्या चमकले

Sri Lanka vs Australia Test: अनुभवी फलंदाज दिनेश चंडिमलच्या नाबाद २०६ धावा आणि डावखुरा फिरकी गोलंदाज प्रबाथ जयसूर्या याने पदार्पणातच केलेली सर्वोत्तम कामगिरी (१२ बळी) याच जोरावर यजमान श्रीलंकेने ऑस्ट्रेलियाला दुसऱ्या कसोटीत एक डाव व ३९ धावांनी पराभूत केले आणि दोन सामन्यांच्या मालिकेत १-१ अशी बरोबरी साधली.(Sri Lanka vs Australia Test Sri Lanka Win Match Draw Series 1-1)

श्रीलंकेने ६ बाद ४३१ या धावसंख्येनंतर सोमवारी पुढे खेळायला सुरुवात केली. दिनेश चंडिमल याने तळाच्या फलंदाजांना हाताशी धरून श्रीलंकेच्या धावसंख्येत मोलाची भर घातली. त्याने ३२६ चेंडूंचा सामना करताना १६ चौकार व ५ षटकारांसह नाबाद २०६ धावांची खेळी साकारली. ऑस्ट्रेलियाविरुद्ध श्रीलंकेसाठी एका डावात सर्वाधिक कसोटी धावा करण्याचा मान त्याने संपादन केला. ऑस्ट्रेलियाकडून मिचेल स्टार्कने ४ व मिचेल स्वेपसनने ३ फलंदाज बाद केले.

जयसूर्या या फिरकी गोलंदाजाने या कसोटीच्या दोन्ही डावांत मिळून १२ फलंदाज बाद केले. पहिल्याच कसोटीत १२ किंवा त्यापेक्षा जास्त फलंदाज टिपणाऱ्या गोलंदाजांच्या यादीत त्याने चौथे स्थान पटकावले. भारताचा नरेंद्र हिरवाणी १६ फलंदाजांना बाद करीत पहिल्या स्थानावर कायम आहे. ऑस्ट्रेलियाच्या आरएल मॅसी याने १६, इंग्लंडच्या एफ मार्टीनने १२ फलंदाज टिपत अनुक्रमे दुसरा व तिसरा क्रमांक पटकावला आहे. जयसूर्याने १२ फलंदाजांना बाद करीत चौथ्या स्थानी आहे. ऑस्ट्रेलियाचा दुसरा डाव १५१ धावांमध्येच गडगडला. पहिल्या डावात ११८ धावांवर ६ फलंदाज बाद करणाऱ्या जयसूर्याने दुसऱ्या डावातही ५९ धावा देत ६ मोहरे टिपले.