'..तर भविष्यात भाजप सरकार संविधान शिल्लक ठेवणार नाही'; 'मविआ'चे उमेदवार सत्यजित पाटलांचा हल्लाबोल

शिरोळ : ‘सर्वसामान्य जनता सुरक्षित राहाण्यासाठी व संविधान (Constitution) टिकविण्यासाठी जागरूक राहण्याची आवश्यकता आहे. लोकसभेमध्ये तुमच्या सूज्ञ विचारांना चालना देणारा आणि काम करणारा हक्काचा प्रतिनिधी पाठविण्याकरिता मला संधी द्या,’ असे आवाहन हातकणंगले (Hatkanangale Lok Sabha) मतदारसंघातील महाविकास आघाडीचे उमेदवार सत्यजित पाटील- सरूडकर (Satyajit Patil- Sarudkar) यांनी केले.

महाविकास आघाडीच्या (Mahavikas Aghadi) पदाधिकाऱ्यांचा व प्रमुख कार्यकर्त्यांचा संवाद मेळावा येथील माजी आमदार उल्हास पाटील यांच्या निवासस्थानाच्या प्रांगणात झाला. सत्यजित पाटील म्हणाले, ‘ही निवडणूक गांभीर्याने घेतली पाहिजे. संविधानाची कशाप्रकारे थट्टा सुरू आहे, हे संपूर्ण देशाने पाहिले आहे.

शेतकरी व कारखानदार यांच्यामध्ये भांडणे लावून सरकार बघ्याची भूमिका घेत आहे. मध्यस्थीची भूमिका सरकारने बजावून, न्याय देण्याची भूमिका घेतली नाही. यामुळे भविष्यात हे सरकार संविधान शिल्लक ठेवणार नाही. ज्या विश्वासाने माझी उमेदवारी जाहीर करण्यात आली आहे, त्याला कोणताही तडा न देता, जनसेवेचे काम अखंडितपणे सुरू ठेवीन. महाविकास आघाडीच्यावतीने शेतकऱ्यांसह सर्वसामान्य नागरिकांसाठी विविध उपयोगी योजना राबविण्यात येतील.’

याप्रसंगी माजी आमदार उल्हास पाटील, डॉ. सुजित मिणचेकर, माधवराव धनवडे, शेखर पाटील, सर्जेराव शिंदे, रावसाहेब भिलवडे आदींनी मनोगत व्यक्त केले. मेळाव्यास शिवसेनेचे जिल्हाप्रमुख वैभव उगळे, राष्ट्रवादीचे तालुकाध्यक्ष विक्रमसिंह जगदाळे, बंटी देसाई, बाबासाहेब सावगावे, अनंत धनवडे, बी. जी. माने, मधुकर पाटील, मंगलाताई चव्हाण आदी उपस्थित होते.