Rohit Pawar : येत्या चार जूनला नक्कीच गोड बातमी मिळेल : रोहित पवार

Rohit Patil Baramati Constituency : ‘‘बारामती लोकसभा मतदारसंघात आम्हाला नागरिकांकडून चांगला प्रतिसाद मिळाला आहे. आम्ही गुंडागर्दी, दडपशाही तसेच आर्थिक ताकदीच्या बाजूला झुकणार नाही, असे मतदार आम्हाला सांगत आहेत. त्यामुळे येत्या चार जूनला नक्कीच गोड बातमी’’ मिळेल असा विश्वास राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी व्यक्त केला आहे.

बारामती लोकसभा मतदार संघाच्या मतदानाबाबत माहिती देण्यासाठी आयोजित पत्रकार परिषदेत त्यांनी पत्रकारांशी संवाद साधला. ‘‘राज्याचे उपमुख्यमंत्री अजित पवार सतत विकासाच्या बाता करतात. पण विकास कोणी केला? २०१४ पर्यंत जर शरद पवारांनी सत्ताच मिळवून दिली नसती तर अजित पवारांना पद कसं मिळालं असतं.

मग त्यांनी विकास कसा केला असता? त्यामुळे विकास कोणी केला, हे सर्वांना माहिती आहे. मात्र, आता दादांना अहंकार आणि मीपणा आला आहे,’’ अशी टीका रोहित पवार यांनी केली.

दत्ता भरणे यांनी शिवीगाळ केलेला व्यक्ती बारामती ॲग्रोचा कर्मचारी आहे. सत्तेत आहात म्हणून मग्रुरी दाखवत असाल तर लोक खपून घेणार नाहीत, असे ते म्हणाले.