'परमसत्य! परमबीर यांनी...', देशमुखांची चांदीवाल आयोगाला माहिती

मुंबई : अँटिलिया स्फोटके प्रकरण (Antilia Bomb Scare) आणि व्यापारी मनसुख हिरेन यांच्या मृत्यूप्रकरणी मुंबईचे माजी पोलिस आयुक्त परमबीर सिंह (Parambir Singh) महाराष्ट्र सरकारची दिशाभूल करत होते, असं माजी गृहमंत्री अनिल देशमुख (Maharashta Former Home Minister Anil Deshmukh) यांनी चांदीवाल आयोगाला सांगितले. देशमुखांनी चांदीवाल आयोगासमोर एक प्रतिज्ञापत्र सादर केले असून त्यामध्ये हे 'परमसत्य' असल्याचं म्हटलं आहे.

25 फेब्रुवारी 2021 रोजी उद्योगपती मुकेश अंबानींच्या मुंबईतील अँटिलिया निवासस्थानाबाहेर जिलेटीनच्या कांड्या असलेली स्कॉर्पिओ कार सापडली होती. ठाणे येथील कार डीलर मनसुख हिरेन यांचा मृतदेह 5 मार्च रोजी मुंब्रा खाडीत सापडला होता. 25 फेब्रुवारी रोजी मुकेश अंबानी यांच्या घर अँटिलियाजवळ सापडलेली स्कॉर्पिओ हिरेन यांची होती, त्यात जिलेटिनच्या कांड्या होत्या. याप्रकरणी सचिन वाझेंना अटक करण्यात आली होती.

अनिल देशमुखांचे वकील गिरीश कुलकर्णी यांनी आयोगाला सांगितले, की त्यांना महाराष्ट्र पोलिसांच्या दहशतवादविरोधी पथकाने (एटीएस) तयार केलेली कागदपत्रे हवी आहेत. त्यांनी काही कागदपत्रे गोळा केली होती. ती मंत्रालयातील अधिकाऱ्यांसमोर सादर केली आहेत. त्यामध्ये संपूर्ण सत्य आहे, असं कुलकर्णी म्हणाले. तसेच देशमुखांना विचारणा केली असता, ''मी गृहमंत्री असताना एटीएसने काही कागदपत्रे गोळा केली होती. त्यामध्ये परमबीर हे महाराष्ट्र सरकारची दिशाभूल करत असल्याचे पुरावे आहेत. ते कधीतरी रेकॉर्डवर आणायला पाहिजे'', असं देशमुख म्हणाले.

''एटीएसच्या तपासामुळे परबमीर सिंह यांची महाराष्ट्र सरकारने सरकारने होमगार्ड महासंचालनालयाच्या पदावर बदली केली. त्यानंतर त्यांनी 20 मार्च 2021 रोजी मुख्यमंत्र्यांना पत्र लिहिलं. परमबीर यांनी बदला म्हणून पत्र लिहिले'', असंही यामध्ये म्हटलं आहे. मात्र, या प्रतिज्ञापत्रावर परमबीर यांचे वकील अनुकूल सेठ यांनी आक्षेप घेतला. त्यानंतर चांदीवाल आयोगाने या अर्जातील काही गोष्टी बदलण्यास सांगितल्या. तसेच सचिन वाझेच्या वकिलाने देखील या अर्जावर आक्षेप घेतला. याप्रकरणी पुढील सुनावणी ३ फेब्रुवारीला होणार आहे.