Breaking News : आखिर अण्णाजी मान गए... भाजप मंत्र्यांनी केलेल्या मनधरणीनंतर उपोषण स्थगित

अहमदनगर ः ज्येष्ठ समाजसेवक अण्णा हजारे यांना उपोषणापासून परावृत्त करण्यात भाजपला यश आले आहे. केंद्रीय कृषी राज्य मंत्री कैलास चौधरी, माजी मुख्यमंत्री, विरोधी पक्षनेते देवेंद्र फडणवीस  यांनी त्यांची मनधरणी केली.

दुपारपासून भाजपचे केंद्रातील आणि राज्यातील नेते अण्णांना उपोषणापासून परावृत्त करण्यात मग्न होते. परंतु अण्णा आपल्या मागण्यांवर ठाम होते. यापूर्वी दिलेली आश्वासने पाळा मगच पुढचे बोला, असे त्यांचे म्हणणे होते.

शेवटी केंद्र सरकारने मागण्यांसंदर्भातील एक मसुदाच तयार करून आणला होता. अण्णांना त्यांनी पंधरा मुद्दे दिले आहेत. ते आपण कसोशीने पाळू, असे त्यांनी सांगितल्यानंतर अण्णा राजी झाले. पत्रकार परिषद घेऊन अण्णांनी आपण उपोषण स्थगित करीत असल्याची घोषणा केली. या आश्वासनांची पूर्तता झाली नाही तर पुन्हा आंदोलन करण्याचा इशाराही त्यांनी दिला.

आज सुमारे चार तास झालेल्या चर्चेनंतर हजारे यांनी उपोषण करण्याचा निर्णय मागे घेतला. भाजप नेत्यांनी दिलेल्या आश्वासनांवर अण्णा राजी झाले आहेत. मात्र, हेही एक आश्वासनच आहे. हमीभावाची हमी नाहीच.

हजारे म्हणाले, की  राष्ट्रहितासाठी आंदोलने करावी लागतात. लोकांचा तो अधिकार आहे. अन्याय, अत्याचार होत असेल, तर शांततेच्या मार्गाने आंदोलन करणे आवश्यक असते. म्हणून मी अनेक वर्षे आंदोलन करीत आहे. या वर्षी शेतकर्यांचे प्रश्न मांडले. पीक उत्पादन केल्यानंतर त्याचा खर्चही शेतकऱ्यांना मिळत नाही. स्वामीनाथन आयोगाच्या शिफारशींसाठी मी आग्रही राहिलो.

शेतकऱ्यांना उत्पादित खर्चासह 50 टक्के अतिरिक्त दर मिळावा, अशी मागणी अनेकदा केली. त्यासाठीच उद्यापासून उपोषण करण्याचे ठरविले होते. आज केंद्रातील मंत्री येथे आले. त्यांनी आपल्या 15 मुद्दे असलेल्या मागण्यांबाबत लवकरच निर्णय घेण्याचे मान्य केले. त्यासाठी लवकरच समिती स्थापन होऊन शेतकऱ्यांसाठी चांगला निर्णय होणार आहे.

केंद्र सरकार याबाबत चांगला निर्णय घेईल, असा मला विश्वास आहे. त्यामुळे उद्याचे आंदोलन स्थगित करीत असल्याचे हजारे यांनी जाहीर केले.