Bachchu Kadu: खोके घेतल्याचे 1 तारखेपर्यंत पुरावे द्या, अन्यथा... बच्चू कडूंचा राणांना इशारा

राज्यातील सत्तांतराच्या वेळी आमदार बच्चू कडू यांनी पैसे घेतल्याचा आरोप आमदार रवी राणा यांनी केला होता. आता त्यासंबंधी 1 नोव्हेंबरपर्यंत पुरावे द्या अन्यथा कायदेशीर कारवाईला तयार राहा असा इशारा बच्चू कडू यांनी राणा यांना दिला आहे. (Bacchu Kadu On Navneet Rana complaint police station)

आमदार बच्चू कडू आणि आमदार रवी राणा यांच्यातील वाद शिगेला पोहोचला आहे. एकमेकांवर खालच्या पातळीवर आरोप-प्रत्यारोप सुरु आहे. दरम्यान, बच्चू कडू यांनी राणा यांना इशारा दिला आहे.

याप्रकरणी बच्चू कडू यांनी थेट राजापेठ पोलिस ठाण्यात रवी राणाविरोधात तक्रार दाखल केली आहे. तसेच रवी राणा यांनी केलेले आरोप सिद्ध झाले तर त्यांच्या घरी जाऊन भांडी घासेन, १ तारखेपर्यंत आरोप सिद्ध करावा, अन्यथा आपण कठोर कायदेशीर पावलं उचलणार असल्याचे संकेतही बच्चू कडू यांनी दिले.

रवी राणाने जे काही आरोप केले आहेत ते त्याने सिद्ध करावे. माझ्यावरील आरोप सिद्ध करण्यासाठी रवी राणाला १ नोव्हेंबरपर्यंतचा वेळ देतो. एक तारखेला मी अमरावतीतील टाऊन हॉलमध्ये येतो. तिथे त्याने आपले पुरावे सादर करावेत. त्याने केलेले आरोप सिद्ध झाले तर मी त्यांच्या घरी भांडी घासेन. असे आव्हान कडू यांनी राणा यांना दिले आहे.

राणा यांनी बच्चू कडू यांच्यावर गंभीर आरोप केले होते. बच्चू कडू यांनी शेतकऱ्यांसाठी जे आंदोलन केले होते ते आंदोलन नसून सेटलमेंट केल्याचा आरोप राणा यांनी केला आहे. त्यानंतर बच्चू कडू यांनी थेट राजापेठ पोलिस ठाण्यात रवी राणाविरोधात तक्रार दाखल केली आहे.