राष्ट्रवादीच्या जन्मानंतरच जातीय अस्मितांना मिळालं बळ - राज ठाकरे

मुंबई : राज्यात एकमेकांच्या जातींबद्दलचा द्वेष वाढतोय. महाराष्ट्राच्या सांस्कृतीक परंपरेवरचा हा डाग आहे. पण राज्यातील या जातीय अस्मितांना राष्ट्रवादी काँग्रेसच्या (NCP) जन्मानंतरच बळं मिळालं, असा थेट आरोप महाराष्ट्र नवनिर्माण सेनेचे अध्यक्ष राज ठाकरे (MNS Raj Thackeray) यांनी केला आहे. एबीपी माझाच्या एका कार्यक्रमात ते बोलत होते.

हिंदुत्वाच्या राजकारणाविरोधात जातीचं राजकारण सुरु झालंय का? या प्रश्नाला उत्तर देताना राज ठाकरे म्हणाले, "महाराष्ट्र आता जातीपातीत गुंतला आहे. गेल्या काही वर्षात जातीय राजकारणात वाढ झाली आहे. जातीचा मुद्दा संबंधीत जातीतील नेत्यांना मोठा करण्यासाठी पुढे आणला जात आहे. सर्वांना आपल्या जातीचा अभिमान असावा पण त्यापेक्षा दुसऱ्याच्या जातीचा द्वेषच जास्त निर्माण झाला आहे. राष्ट्रवादी काँग्रेसच्या जन्मानंतरच राज्यात या जातीय अस्मितांना बळ मिळालं आहे."

'जेम्स लेन' प्रकरण रचलं गेलं

जेम्स लेन कुठून आला? त्यानं कुठलं पुस्तक लिहिलं? तो काय जॉर्ज बर्नार्ड शॉ होता का? असे प्रश्न विचारताना राज ठाकरे म्हणाले, "हे पुस्तक कोणी लिहिलं तर ब्राह्मणांनी लिहिलं असं सांगू ते मराठा समाजापर्यंत पोहोचवलं गेलं. हे सगळं कट-कारस्थान आहे." काही जणांनी आपल्या राजकीय स्वार्थासाठी या गोष्टी रचल्या असा आरोपही त्यांनी यावेळी केला.