Laser Show: गणेशोत्सवातील लेझर शो घातक; कोल्हापुरात 63 जणांच्या डोळ्याला इजा

कोल्हापूर : दोन वर्षाच्या कोरोनाकाळानंतर झालेला गणेशोत्सव उत्साहात साजरा झाला. दरम्यान, गणेश उत्सव मिरवणुकीतील लेझर शो घातक ठरले आहेत. कोल्हापुरातील विसर्जन मिरवणुकीत लेझर शोमुळे ६३ जणांच्या डोळ्याला इजा झाल्याची माहिती समोर आली आहे. त्याचबरोबर डोळ्याला इजा होणाऱ्या रूग्णांमध्ये अजून वाढ होण्याची शक्यता वर्तवली गेली असून कोल्हापूर जिल्हा नेत्र संघटनेने ही माहिती दिली आहे.

(Laser Show Harmful For Eyes Latest Updates)

दरम्यान, कोल्हापुरात विसर्जन मिरवणुकीत डीजेचा लेझर शो आकर्षणाचा केंद्रबिंदू ठरला होता. तोच लेझर शो आता चिंतेचा विषय ठरला असून यामुळे अनेक जणांच्या डोळ्याला इजा झाल्या आहेत. त्याचबरोबर मोबाईलवरही परिणाम झाल्याचं समोर आलं आहे. तर लेझर शो मुळे होणाऱ्या इजा लक्षात घेता पोलिसांनी मंडळांना परवानगी नाकारली होती पण काही मंडळांनी पोलीस परवानगीशिवाय लेझर शो केल्याचं समोर आलं आहे.

कोल्हापुरातील या लेझर शोचे अनेक व्हिडिओ व्हायरल झाले होते. तर या मिरवणुकीत अनेक लहान मुले आणि जेष्ठ नागरिक सामील झाले होते. यामुळे डोळ्याला झालेल्या समस्या वाढताना दिसत असून हळूहळू इजा झालेल्या लोकांची माहिती समोर येऊ शकते अशी माहिती आहे. त्याचबरोबर अनेकांच्या फोनला सुद्धा यामुळे समस्या आल्या आहेत. या रूग्णसंख्येत वाढ होण्याची भिती व्यक्त केली जात आहे.