झेडपीच्या शिक्षकांच्या ९ जूननंतर आंतरजिल्हा बदल्या

सोलापूर : जिल्हा परिषदेच्या दोन हजार ७९७ शाळांमधील पाचवी ते आठवीपर्यंतच्या जवळपास दीड लाख विद्यार्थ्यांना अवघे ५० शिक्षक विज्ञान विषय शिकवितात, अशी वस्तुस्थिती समोर आली आहे. झेडपी शाळांच्या गुणवत्तेवर प्रश्नचिन्ह उपस्थित करीत अनेक पालकांनी त्यांची मुले दुसरीकडे खासगी शाळांमध्ये विशेषत: इंग्रजी माध्यमाच्या शाळांमध्ये घातली आहेत. तरीदेखील, विज्ञान शिक्षक भरले गेले नाहीत, हे विशेष. दरम्यान, ९ जूननंतर ग्रामविकास विभागातर्फे ९ जूननंतर शिक्षकांच्या ऑनलाइन बदल्या होणार आहेत.

जिल्हा परिषदेच्या शाळांमधील पटसंख्या वाढावी, यादृष्टीने मुख्य कार्यकारी अधिकारी दिलीप स्वामी, शिक्षणाधिकारी किरण लोहार हे सातत्याने प्रयत्न करीत आहेत. पण, कोरोनामुळे मागील दोन वर्षांपासून शाळा बंद राहिल्याने विद्यार्थ्यांच्या गुणवत्तेचा मोठा प्रश्न निर्माण झाला आहे. पण, दहावीनंतर विज्ञान विषयातून पुढील शिक्षण घेणाऱ्या विद्यार्थ्यांचा पाया मजबूत व्हावा म्हणून विज्ञान विषयाला स्वतंत्र शिक्षक असणे आवश्यक आहे. त्यासाठी पदे मंजूर असतानाही समाजशास्त्र विषय शिकविणाऱ्या उपशिक्षकांना त्याची जबाबदारी देण्यात आली. उपशिक्षक म्हणून नोकरी मिळाल्यानंतर बीएस्सी झालेल्यांची संख्या अत्यल्प असल्याने त्यावर अद्याप निर्णय घेतला गेला नाही. पण, विद्यार्थ्यांची गुणवत्ता वाढावी, जिल्हा परिषदेच्या शाळांमधील पटसंख्या वाढावी, यासाठी प्राथमिक शिक्षणाधिकाऱ्यांनी आता ती रिक्तपदे भरण्याचा निर्णय घेतला आहे. पण, समाजशास्त्राचा नकार घेऊन विज्ञान शिक्षक म्हणून नियुक्ती मागणाऱ्या शिक्षकांपैकी कितीजण त्याला होकार देतील, याकडे सर्वांचे लक्ष लागले आहे. उपशिक्षक पदावरून विज्ञानाच्या माध्यमातून त्या शिक्षकांना पदोन्नती मिळणार आहे. मात्र, त्यांना आगामी तीन ते पाच वर्षांत त्या विषयातून पदवी घ्यावीच लागणार आहे. अन्यथा, त्यांना पदोन्नती व त्यानुसार वेतनश्रेणीही मिळणार नाही.

झेडपी शाळांची स्थिती...

• एकूण शाळा

• २७९७

• विद्यार्थी संख्या

• २.०२ लाख

• एकूण शिक्षक

• ९,२८७

• विज्ञान शिक्षक मंजूर

• ७३७

• विज्ञानाचे शिक्षक कमी

• ६८७

९ जूननंतर विज्ञान शिक्षकांची नियुक्ती

जिल्हा परिषदेच्या शाळांमध्ये काही वर्षांपासून विज्ञानाची ६८७ पदे रिक्त आहेत. पण, आता ९ जूननंतर बारावी विज्ञान विषयातून उत्तीर्ण झालेल्या साडेबाराशे उपशिक्षकांना समुपदेशनातून त्या ठिकाणी संधी दिली जाणार आहे.

- किरण लोहार, प्राथमिक शिक्षणाधिकारी, सोलापूर

शिक्षकांच्या उद्यापासून आंतरजिल्हा बदल्या

राज्यातील जिल्हा परिषद शाळांमधील शिक्षकांच्या आंतरजिल्हा बदल्यांची प्रक्रिया यंदा प्रथमच ऑनलाइन राबविली जाणार आहे. त्यासाठी तयार केलेले पोर्टल पूर्ण तयार झाले असून बदल्यांची प्रक्रिया आता ९ जूनपासून सुरू होणार आहे. १० टक्क्यांपेक्षा अधिक रिक्तपदे असलेल्या जिल्हा परिषदांनाही या बदली प्रक्रियेत सहभाग घेता येणार आहे.