Jitendra Awhad: आव्हाडांकडूनही 'लाव रे तो व्हीडिओ'; तक्रारदार महिलेचा 'बहीण' म्हणून उल्लेख

मुंबईः राष्ट्रवादी काँग्रेसचे प्रदेशाध्यक्ष जयंत पाटील आणि आमदार जितेंद्र आव्हाड यांनी पत्रकार परिषद घेतली. यामध्ये त्यांनी एक व्हीडिओ सादर केला आहे. या व्हीडिओमध्ये सदरील तक्रारदार महिलेला उद्देशून आव्हाड यांनी 'बहीण' असा उल्लेख केला आहे. हा व्हीडिओ एका जाहीर कार्यक्रमातील आहे.

रविवारी रात्री कळवा आणि ठाणे शहराला जोडणाऱ्या कळवा-खाडी पुलाचे उद्घाटन झाले. यावेळी मुख्यमंत्री एकनाथ शिंदे, खासदार श्रीकांत शिंदे, आमदार जितेंद्र आव्हाड उपस्थित होते. या कार्यक्रमादरम्यान आमदार जितेंद्र आव्हाड यांनी विनयभंग केल्याचा आरोप एका महिलेने केला आहे.

हेही वाचा: मामाच्या जमिनीवरून सावकाराला पळविणारा 'डेबू' कसा बनला गाडगेबाबा.....

राष्ट्रवादी काँग्रेसचे प्रदेशाध्यक्ष जयंत पाटील यांनी या पत्रकार परिषदेमध्ये कलम ३५४ या कायद्याची सविस्तर माहिती दिली. काल नेमकं काय घडलं त्याचाही घटनाक्रम सांगितला. अशा पद्धतीने एखाद्याला बदनाम करणं चुकीचं असल्याचं पाटील म्हणाले. शिवाय 'हर हर महादेव' चित्रपटाबाबत जितेंद्र आव्हाड यांच्या भूमिकेला राष्ट्रवादी काँग्रेसचं समर्थ असल्याचंही जयंत पाटलांनी सांगितलं.

''आम्ही विनयभंगाचं समर्थन कधीही करणार नाही. मात्र या घटनेमध्ये तसं काहीही झालेलं नाही. जितेंद्र आव्हाड यांनी सदरील महिलेला मुख्यमंत्र्यांच्या गाडीपासून केवळ दूर केलं. त्यामुळे मुख्यमंत्र्यांनी या प्रकरणात लक्ष घालून निर्णय घ्यावा'' अशी मागणी जयंत पाटील यांनी केली.