Ladki Bahin Yojna: ''लाडकी बहीण योजनेचा लाभ उत्तर भारतीयांना मिळणार'' संजय निरुपम यांच्यावर जबाबदारी

CM Eknath Shinde: राज्याचे मुख्यमंत्री एकनाथ शिंदे यांनी राज्यामध्ये लाडकी बहीण योजना लागू करुन त्या माध्यमातून गरीब कुटुंबातील महिलांना महिन्याला दीड हजार रुपये देण्याचा निर्णय घेतला आहे. या योजनेचा लाभ जसा मूळच्या महाराष्ट्रीयन महिलांना मिळणार आहे, तसंच याचा लाभ उत्तर भारतीय महिलांनाही मिळणार आहे. शिवसेना नेते संजय निरुपम यांच्यावर ही जबाबदारी देण्यात आली आहे.

मुख्यमंत्री माझी लाडकी बहीण योजनेच्या नोंदणीसाठी उत्तर भारतीय संवाद सभा होणार आहे. माजी खासदार आणि नुकतंच शिवसेनेमध्ये दाखल झालेले संजय निरुपम यांच्या उपस्थितीत कार्यक्रमाला सुरुवात होणार आहे. उत्तर भारतीय पॉकेट्समध्ये जवळपास ४० संवाद सभा होणार आहेत.

कार्यक्रमाच्या पहिल्या टप्प्यामध्ये 18 ठिकाणी उत्तर भारतीय संवाद सभा अभियान राबविण्यात येणार असून उत्तर भारतीय महिलांना या योजनेत जोडण्याकरीता शिवसेना प्रयत्न करत आहे. मुंबई आणि मुंबई मेट्रो परिसरातील नालासोपारा, बोरीवली, दहिसर, कांदिवली, मालाड, गोरेगाव, दिंडोशी, जोगेश्वरी, अंधेरी, कालिना, चांदिवली, चेंबूर, घाटकोपर, माहीम आणि वरळी येथेही उत्तर भारतीय संवाद सभा अभियान राबविण्यात येणार आहे.

अभियानाची सुरुवात शुक्रवार दि. २ ऑगस्ट २०२४ रोजी सायंकाळी मालाड पश्चिम येथून करण्यात येणार आहे. लाडकी बहीण योजनेसाठी अर्ज करण्याची शेवटची तारीख ३१ जुलै होती. परंतु राज्य सरकराने यामध्ये एक महिन्याची वाढ करुन ३१ ऑगस्टपर्यंत मुदत दिली आहे.

दरम्यान, ‘मुख्यमंत्री माझी लाडकी बहीण योजने’ला संपूर्ण राज्यातून तुफान प्रतिसाद मिळत आहे. योजनेची नोंदणी सुरु झाल्यापासून अवघ्या २५ दिवसांत १ कोटी ८० लाखांहून अधिक अर्ज सादर झाले आहेत. लवकरच २ कोटींचा टप्पा गाठेल, अशी माहिती शिवसेना उपनेते संजय निरुपम यांनी दिली होती.