Cabinet Expansion शिंदे गटाकडून सहा आमदारांना मंत्रिमंडळात स्थान मिळण्याची शक्यता

राज्यात शिंदे-फडणवीस सरकार स्थापन झाल्यानंतर रखडलेला मंत्रिमंडळाचा विस्तार अखेर उद्या सकाळी ११ वाजता होणार असल्याची माहिती समोर आली आहे. अशातच, राजकीय वर्तुळात चर्चा सुरू झाली ती म्हणजे शिंदे गटाकडून कुणाला मंत्रिपदे मिळणार याची. दरम्यान, संभाव्य यादी आली समोर आली आहे. एकनाथ शिंदे गटाकडून सहा आमदारांना मंत्रिमंडळात स्थान मिळण्याची शक्यता राजकीय गोटात वर्तवण्यात येत आहे.(Maharashtra Cabinet Expansion News Eknath Shinde BJP)

मंत्रिपदाची शपथ कोण घेणार, कुणाची वर्णी लागणार, तर कुणाला अजून वाट पाहावी लागणार, याकडे सर्वांचे लक्ष लागले आहे. दरम्यान, शिंदे गट ६ ते ७ तर भाजपचे 11 जण शपथ घेऊ शकतात असे सांगण्यात येत आहे.

एकनाथ शिंदे गटाकडून सहा आमदारांचा मंत्रिमंडळ विस्तारात समावेश होण्याची शक्यता आहे. उदय सामंत, दादा भुसे, संदीपान भुमरे, गुलाबराव पाटील, अब्दुल सत्तार आणि शंभुराज देसाई यांना मंत्रिमंडळात स्थान दिले जाऊ शकते.

भाजपकडूनही संभाव्य मंत्र्यांची नावे चर्चेत आहेत. सुधीर मुनगंटीवार, चंद्रकांत पाटील, चंद्रशेखर बावनकुळे, गिरीश महाजन, नितेश राणे, माधुरी मिसाळ, संजय कुटे, रवी राणा यांना मंत्रिमंडळात स्थान मिळू शकतं.

लवकरच मंत्रीमंडळाचा विस्तार होणार आहे. मंत्रिमंडळाचा विस्तार होण्यास कोणत्याही प्रकारची अडचण किंवा अडथळा नाही. खात्यांची जबाबदारी सचिवांकडे दिली आहे. कोणत्याही खात्याचे काम थांबवले नाही. मुख्यमंत्री आणि उपमुख्यमंत्री म्हणून जे काही निर्णय घ्यायचे आहेत ते घेत आहेत, असे एकनाथ शिंदे यांनी शनिवारी माध्यमांशी बोलताना सांगितले होते.