गृहमंत्र्यांच्या निर्णयाचे मोहित कंबोज यांनी केले स्वागत; म्हणाले...

मनसे अध्यक्ष राज ठाकरे (Raj Thackeray) यांनी मशिदींवरील भोंगे काढण्याबाबत सरकारला अल्टीमेटम दिल्यानंतर भोंग्यावरून महाराष्ट्रात वातावरण तापलं आहे. मंदिर किंवा मशीदवर लाऊडस्पीकर लावण्यासंदर्भातचा निर्णय गृहमंत्री दिलीप वळसे-पाटील (Dilip Walse-Patil) जाहीर केला. परवानगी असलेल्या लाऊडस्पीकरला डेसिबल मर्यादा ठरवून परवानगी द्यावी, अशा स्पष्ट सूचना त्यांनी दिल्या. तसेच निर्णयाचे उल्लंघन केल्यास कायदेशीर कारवाई केली जाईल असा इशाराही वळसे-पाटील यांनी दिला. या निर्णयाचे स्वागत भाजप नेते मोहित कंबोज यांनी (Mohit Kamboj) केले आहे. यासंदर्भात त्यांनी व्हिडिओ शेअर केला आहे.

मोहित कंबोज म्हणाले, राज्याचे गृहमंत्री दिलीप वळसे-पाटील यांनी आज मंदिर किंवा मशीदीवरील लाऊडस्पीकर वाजवायचे असल्यास परवानगी घेऊन वाजवावी असा निर्णय घेतला याबाबत त्याचे स्वागत करतो. याचबरोबर येत्या काळात मशिदीवर लाऊड स्पीकर लावण्यासाठी जी नियमावली ठरवणार आहात तीच नियमावली मंदिराच्या लाऊडस्पीकर बाबत ठरवावी अशी विनंतीही केली.

पुढे ते म्हणाले, ज्या मशिदीवर अनधिकृत लाऊड स्पीकर आहेत त्यांना परवानगी देऊ नये. तसेच मदरशांवरील लाऊडस्पीकर देखील काढून टाकावेत. कारण ८० टक्के लाऊडस्पीकर हे मदरशांवर लावलेले आहेत. तर २० टक्के लाऊड स्पीकर हे मशिदीवर आहेत असेही ते म्हणाले.

महाराष्ट्र सरकारला विनंती करताना ते म्हणाले, सुप्रीम कोर्टाचे नियम सरकारने योग्य रीतीने राबवावे. ध्वनी प्रदूषण ही एक खूप मोठी समस्या आहे. येत्या काळात मशिदीवरील अनधिकृत भोंगे उतरवावे. याची सुरुवात ही मुंबईवरून व्हावी जेणेकरून देशाला दिशा मिळेल. आणि ही एक मोठी जनतेची सामाजिक चळवळ होऊन जाईल.