Shiv Sena : 'मातोश्री'वर महिन्याला 100 कोटी जायचे; शिंदे गटाच्या खासदाराचा उद्धव ठाकरेंवर गंभीर आरोप

बुलढाणा : एकनाथ शिंदे (Eknath Shinde) यांच्यासह अनेक आमदारांनी केलेल्या बंडानंतर राज्यातील महाविकास आघाडी सरकार कोसळलं. मात्र, हे सर्व एवढ्यावरच थांबलं नाही, तर शिवसेनेला (Shiv Sena) अजूनही एकावर एक झटके बसताना दिसत आहेत. त्यातच आता शिंदे गटातील नेते उद्धव ठाकरेंवर (Uddhav Thackeray) थेट टीका करायला लागले आहेत.

आता शिंदे गटाचे खासदार प्रतापराव जाधव (Prataprao Jadhav) यांनी उद्धव ठाकरेंवर गंभीर आरोप केला आहे. मातोश्रीवर प्रत्येक महिन्याला 100 कोटी रुपये नेले जात होते. सचिन वाझे हेच मातोश्रीवर हे खोके घेऊन जात होते, असा खळबळजनक दावा प्रतापराव जाधव यांनी केला आहे.

जाधव यांच्या या आरोपांनी एकच खळबळ उडाली आहे. राज्यात नवीन पालकमंत्र्यांची नियुक्ती केल्यानंतर गुलाबराव पाटील पहिल्यांदाच बुलढाणा जिल्ह्यात पालकमंत्री म्हणून आले होते. यावेळी मेहकरमध्ये गुलाबराव पाटलांच रॅली काढून जोरदार स्वागत करण्यात आलं. त्यानंतर हिंदू गर्वगर्जना कार्यक्रमाचं आयोजन करण्यात आलं होतं. या कार्यक्रमातून शिंदे गटात गेलेल्या खासदार प्रतापराव जाधव यांनी थेट मातोश्रीवरच गंभीर आरोप केलेत.

दरम्यान, 50 खोके एकदम ओके म्हणताना शंभर खोके मातोश्री ओके तेही दर महिन्याला जात असतं, असं म्हणत जाधव यांनी उद्धव ठाकरेंवरच गंभीर स्वरूपाचा आरोप केलाय. मातोश्रीला दर महिन्याला शंभर खोके जात असल्याचा खळबळजनक दावा, प्रतापराव जाधव यांनी करून एकच खळबळ उडवून दिली आहे. त्यांच्या या आरोपानंतर ठाकरे गटातील शिवसैनिक आक्रमक होण्याची शक्यता आहे.