मुंबईतील शाळांची घंटा उद्या वाजणार की नाही? आज होणार निर्णय

मुंबई : महापालिका (muncipal corporation) शिक्षण विभागाकडून (education department) शाळा सुरु करण्यासंदर्भात जोरदार तयारी करण्यात आली असली तरी मुंबईतील प्राथमिक शाळा प्रत्यक्ष वर्ग सुरू होणार की नाही ? यावर आज निर्णय होणार आहे.

पालकांमध्ये मोठ्या प्रमाणात धास्ती

राज्यातील प्राथमिक शाळा प्रत्यक्ष वर्ग सुरू झाल्या नंतर, मुंबईतील शाळांचे प्रत्यक्ष वर्ग १५ डिसेंबर पासून सुरू करण्याचे पालिकेने घोषणा केली होती. मात्र मागील काही दिवसांपासून कोरोनाच्या नव्या ओमिक्रोन (omicron) या व्हेरीएटमुळे पालकांमध्ये मोठ्या प्रमाणात धास्ती निर्माण झाली आहे. त्यामुळे या शाळा सुरू होतील की नाही, अशी सांशकता ही पालकांमध्ये व्यक्ती केली जात आहे.

आजच्या आढावा बैठकीत होणार निर्णय

शाळा कोणत्याही स्थितीत सुरू केल्या जाणार असून यामध्ये तूर्तास कोणताही बदल होणार नाही, असे स्पष्टीकरण महापालिका शिक्षण विभागाकडून देण्यात आले होते. काही शाळांना याविषयीची माहिती मिळाली नसल्याने त्या पुन्हा सूचना देण्यात आल्याचे अधिकाऱ्यांकडून सांगण्यात आले. शाळा सुरू करण्यासाठी आज मंगळवारी, 14 डिसेंबर रोजी सकाळी एक आढावा बैठक बोलावण्यात आली असून त्यात काही राहिलेल्या त्रुटींवर तातडीने मार्ग काढले जाणार असल्याचे शिक्षणाधिकाऱ्यानी सांगितले.