Shivaji Maharaj : राजकोट समुद्रकिनारी उभारण्यात येणार छत्रपती शिवरायांचा अश्वारुढ पुतळा; 'या' दिवशी PM मोदींच्या हस्ते उद्‌घाटन

मालवण : शहरातील मेढा-राजकोट समुद्रकिनारी ४ डिसेंबरला होणाऱ्या नौदल दिनाच्या निमित्ताने (Navy Day) छत्रपती शिवाजी महाराजांचा (Chhatrapati Shivaji Maharaj) अश्वारूढ पुतळा बसविण्यात येत आहे. येथील शिवपुतळा परिसर सुशोभीकरणासाठी सुमारे ५ कोटी रुपये खर्च करण्यात येणार आहेत. त्यामुळे येथील पर्यटनात आणखी एका आकर्षणाची भर पडणार आहे.

येत्या काळात राजकोट परिसर पर्यटनाचा नवा हब बनणार आहे. यामुळे अनेकांना रोजगाराची चांगली संधीही निर्माण होणार आहे. पर्यटनाची राजधानी म्हणून मालवणकडे पाहिले जाते. काही वर्षांपूर्वी येथे येणारा पर्यटक हा ऐतिहासिक किल्ले सिंधुदुर्ग, तारकर्ली, देवबाग येथेच भेट देऊन पर्यटनाचा आनंद लुटत होते. त्यामुळे पर्यटन वाढविण्यासाठी नवनवीन आकर्षण निर्माण करणे गरजेचे बनले.

यात सुरुवातीस भर पडली ती स्कुबा, स्नॉर्कलिंग, साहसी जलक्रीडा प्रकारांची. शहरातील बंदर जेटी, दांडी, चिवला बीचसह वायरी भूतनाथ, तारकर्ली, देवबाग येथे स्कुबा, स्नॉर्कलिंग, साहसी जलक्रीडा प्रकार सुरू झाल्याने येथे येणाऱ्या पर्यटकांच्या संख्येत मोठी वाढ झाली. वाढत्या पर्यटनामुळे स्थानिक तरुणांना रोजगाराची चांगली संधीही प्राप्त झाली. शहरात येणारा पर्यटक हा किल्ले सिंधुदुर्ग, साहसी जलक्रीडा प्रकाराचा आनंद लुटल्यावर माघारी परतत असल्याने पर्यटकांचे वास्तव्य कसे वाढेल यादृष्टीने प्रयत्न होणे गरजेचे बनले.

यात शहरातील मेढा राजकोट परिसरातील रॉक गार्डनमध्ये म्युझिकल फाउंटन, सेल्फी पॉईंट यासह अन्य नावीन्यपूर्ण उपक्रम राबविण्यात आले. त्याचबरोबर चिवला बीच कम बंधाऱ्यावर आकर्षक विद्युतरोषणाई अशी नवनवीन आकर्षणे निर्माण करण्यात आली. येत्या ४ डिसेंबरला येथे नौसेना दिन साजरा करण्यात येणार आहे. या दिनाच्या पार्श्वभूमीवर नौदल विभागाच्या वतीने राजकोट येथील समुद्रकिनाऱ्यावर छत्रपती शिवाजी महाराजांचा अश्वारूढ पुतळा बसविण्यात येत आहे.

राजकोट परिसरात ऐतिहासिक कुशेवाडा, मौनीनाथ मंदिर, सुवर्ण गणेश मंदिर, रॉकगार्डन, त्याला लागूनच चिवला बीच परिसर असल्याने येत्या काळात राजकोट परिसर पर्यटनाचा नवा हब बनणार आहे. शिवपुतळ्याचे उद्‌घाटन ४ डिसेंबरला पंतप्रधान नरेंद्र मोदी (Narendra Modi) यांच्या हस्ते होणार आहे. या पार्श्वभूमीवर सध्या हे काम युद्धपातळीवर सुरू आहे. शहरात छत्रपती शिवाजी महाराज यांचा एकही पुतळा नव्हता.

असा असणार पुतळा

छत्रपती शिवाजी महाराजांचा ३५ फूट उंचीचा पुतळा राजकोट समुद्रकिनारी बसविण्यात येणार आहे. छत्रपती शिवाजी महाराजांच्या पुतळ्याचा दर्शनी भाग हा किल्ले सिंधुदुर्गच्या दिशेने असणार आहे. छत्रपतींच्या हातात तलवार असलेला पुतळा उभारण्यात येणार आहे. पुतळ्याच्या परिसरात किल्ले सिंधुदुर्गप्रमाणे तटबंदी उभारण्यात येणार आहेत. संपूर्ण परिसर शिवकालीन वातावरण निर्माण करणारा बनविण्यात येणार आहे.