''...तर आता देवेंद्र फडणवीस माफी मागणार का?'' नवाब मलिकांचा सवाल

मुंबई : विरोधी पक्षनेते देवेंद्र फडणवीस (Devendra Fadnavis) यांनी म्हटले की, मी आरोप केल्यानंतर कोणालाही माफी मागत नाही. त्यावरूनच आता मंत्री नवाब मलिक (Nawab Malik) यांनी फडणवीसांना सवाल विचारले आहेत. '' फडणवीस म्हणाले होते की, नवाब मलिक यांच्या जावयाच्या घरून गांजा मिळाला. देवेंद्रजी तुमचे वानखेडेसोबत संबंध आहेत. त्यांच्याकडून अहवाल मागवा की काही आक्षेपार्ह वस्तू सापडली का? त्यांच्याकडे पंचनामा आहे. नाहीतर मी पंचनामा सार्वजनिक करेन. तर देवेंद्रजी आता तुम्ही माफी मागणार का?'' असा सवाल मलिकांनी उपस्थित केला.

''जयदीप राणा हा ड्रग्स पेडलर आहे. त्याबाबत मी तुम्हाला माहिती दिली. तो एका गाण्याचा फायनान्स हेड होता. मी कोणाच्या पत्नीचा यामध्ये उल्लेख केला असं म्हटलं जात आहे. गेल्या २६ दिवसांपासून दोन महिलांशिवाय कोणाची पत्नी, आई, बहीण यांचा उल्लेख केला नाही. या दोन्ही महिलांचा संबंध आहे त्यामुळे त्यांचा उल्लेख मी केला.'' असंही नवाब मलिक म्हणाले.

दुसऱ्यांची आई-बहीण या महिला नाहीत का? -

''किरीट सोमय्या यांनी पत्रकार परिषदेत अजित पवारांच्या आई आणि बहिणीचा उल्लेख केला. खडसे आणि संजय राऊत यांच्या पत्नीला ईडीच्या कार्यालयापर्यंत पोहोचविण्याचे काम केले आहे. या महिला नाहीत का? फक्त भाजप नेत्यांच्या घरातील महिला या महिला आहेत का? टीका करण्याच्या बाबतीत भाजपचा स्तर घसरला आहे'', असेही ते म्हणाले.

''ड्रग्स पेडलर हे फायनान्स हेड आहेत हे आरोप मी हवेत केले नाही. मी जावयाचे आरोपपत्र कमजोर करण्यासाठी हे आरोप करत आहे, अशी टीका फडणवीसांनी केली. मात्र, तुम्ही वकील आहात. त्यामुळे एनडीपीएस कायद्याची माहिती तुम्हाला माहिती असेल. हे आरोप खोटे आहेत. यासाठी आता तुम्ही माफी मागणार का?'' असेही नवाब मलिक म्हणाले.