Ajit Pawar: मविआमध्ये पुन्हा तेढ; राऊतांच्या ‘त्या’ टीकेला अजित पवारांचं प्रत्युत्तर!

ठाकरे गटाचे खासदार संजय राऊत यांनी शिवसेनेचे (ठाकरे गट) मुखपत्र असणाऱ्या ‘सामना’ वृत्तपत्रातील अग्रलेखातून राष्ट्रवादी काँग्रेसचे अध्यक्ष शरद पवार यांच्या राजीनाम्यावर आणि राष्ट्रवादीत कथित बंड होण्यावर भाष्य केलं. ईडी, सीबीआयसह इतर तपास यंत्रणांच्या भीतीपोटी राष्ट्रवादी काँग्रेसमधील एक गट भाजपाबरोबर जाण्याच्या तयारीत होता. पण शरद पवारांनी राजीनामा देत बंडखोरीची योजना हाणून पाडली, असं संजय राऊतांनी या अग्रलेखात म्हंटलं आहे.

राऊतांच्या या वक्तव्यावर राष्ट्रवादी काँग्रेसचे अध्यक्ष शरद पवार, छगन भुजबळ यांच्यासह आता विरोधी पक्षनेते अजित पवार यांनी देखील प्रत्युत्तर दिलं आहे. अजित पवार बोलताना म्हणाले की, 'एखादी व्यक्ती मनाला वाटेल तसं काहीही बोलत असेल तर त्यांच्या मताला महत्त्व देण्याचं काहीच कारण नाही, असं पवारांनी म्हंटलं आहे. त्याचबरोबर ते त्यांचं वैयक्तिक मत आहे. त्यांचं मत म्हणजे महाराष्ट्रातील जनतेचं मत, असं असू शकत नाही, असा खोचक टोलाही पवारांनी राऊत यांना लगावलाअ आहे.

राष्ट्रवादीतील कथित बंडखोरी आणि’सामना’ वृत्तपत्रातील दाव्याबद्दल प्रश्नावर उत्तर देताना अजित पवार म्हणाले, “राष्ट्रवादी काँग्रेसमधील एक गट भाजपाबरोबर जाण्यासाठी बॅगा भरून तयार होता, असं त्यांनी (संजय राऊत) सांगितलं आहे. त्यावर शरद पवारांनी काय सांगितलं? हे तुम्ही ऐकलं का? आमच्या राष्ट्रीय नेत्याने सांगूनही कुणी त्यांच्या मनाला वाटेल तसं बोलत असेल तर त्याला महत्त्व द्यायचं काहीच कारण नाही, असं मला वाटत नाही.”

अजित पवार पुढे म्हणाले की, ‘सामना’च्या संपादकांनी त्यांचं मत व्यक्त केलं. त्याचं मत म्हणजे संपूर्ण राज्याचं मत नसतं, ते त्यांचं वैयक्तिक मत आहे. जितक्या व्यक्ती तितकी वेगवेगळी मतं असू शकतात. त्यामुळे त्यांचं मत तसं असलं तरी महाराष्ट्रातील जनतेचं मत तसं नाही असंही पुढे अजित पवार म्हणाले आहेत.