'बाळासाहेबांच्या न्यायाचा धडा घेत CM ठाकरे राजीनामा देणार का?'

मागील काही दिवसांपासून राज्याचे राजकीय वातावरण चागलचं ढवळलं आहे. राज्यात कारवाईचा सपाटा सुरू असताना ठाकरे कुटुंबीयांचे निकटवर्तीय आता ईडीच्या (ED) रडारवर आहेत. मुख्यमंत्री उद्धव ठाकरे (CM Uddhav Thackeray) यांचे मेहुणे व रश्मी ठाकरे (Rashmi Thackeray) यांचे सख्खे भाऊ श्रीधर पाटणकर (Shridhar Patankar) यांच्यावर ईडीने कारवाई केली आहे. त्यामुळे विरोधकांनी ठाकरे सरकारवर निशाणा साधला आहे. दरम्यान, आता भाजपाचे नितेश राणे (Nitesh Rane) यांनी ट्विट करत मुख्यमंत्री उद्धव ठाकरेंवर हल्लाबोल केला आहे.

यात ते म्हणतात, इतिहास सांगतो की, मनोहर जोशी (Manohar Joshi) यांच्या मुलावर भ्रष्टाचाराचे आरोप झाल्याने हिंदुह्रदयसम्राट बाळासाहेब ठाकरे यांनी जोशी यांना मुख्यमंत्री पदाचा राजीनामा द्यायला सांगितला होता. आज उद्धव ठाकरे मुख्यमंत्री आहेत आणि त्यांच्या मेहुण्यावर भ्रष्टाचाराचे आरोप झालेत. हाच नियम इथे लागू होतो, की शिवसैनिकांचे नियम वेगळे आहेत? असा सवाल नितेश राणेंनी उपस्थित केला आहे.

दरम्यान, मुख्यमंत्र्यांचे मेहुणे व व्यावसायिक श्रीधर पाटणकर (Shridhar Patankar) यांना जोरदार धक्का देत ईडीने (ED) त्यांची कोट्यवधींची मालमत्ता जप्त केली. यावरून बाळासाहेबांच्या न्यायाचा धडा घेत उद्धव ठाकरे राजीनामा देणार का? असा सवाल नितेश राणे यांनी उपस्थित केला आहे. तर पाटणकरांवरील कारवाई सूडबुद्धीने झाली असल्याचा आरोप महाविकास आघाडीतील (Mahavikas Aaghadi Govt.) नेत्यांकडून करण्यात येत आहे. यामुळे आता पुन्हा एकदा भाजपा विरुद्ध शिवसेना असा वाद उभा राहिला आहे.