कर्मचाऱ्यांच्या संपामुळे राज्य अंधारात जाणार का? ऊर्जामंत्र्यांनी दिलं उत्तर

नागपूर : खासगीकरणाच्या विरोधात देशव्यापी संप पुकारला आहे. यामध्ये वीज कर्मचाऱ्यांनी (Electricity Worker Strike) देखील सहभाग घेतला आहे. तसेच वेस्टर्न कोलफिल्ड लिमिटेडचे (WCL) कर्मचारी देखीस संपात सहभागी झाले आहेत. त्यामुळे राज्य अंधारात जाईल का? अशी भीती निर्माण झाली आहे. त्याबाबतच ऊर्जामंत्री नितीन राऊत (Nitin Raut) यांनी उत्तर दिलं आहे. (Nitin Raut on Electricity Worker Strike)

आम्ही देखील खासगीकरणाच्या विरोधात आहोत. पण, खासगीकरणाचा डाव आखून संप पुकारत असतील तर आम्ही कारवाई करू, असा इशारा ऊर्जा मंत्री नितीन राऊत यांनी दिला आहे. वीज कर्मचाऱ्यांसोबत बैठक असून उद्या सकारात्मक चर्चा होईल. राज्य अंधारात जाईल, अशी परिस्थिती राज्यावर येऊ देणार नाही, असं आश्वासन संघटनांनी दिलं असल्याचं नितीन राऊतांनी सांगितलं.

'...तर मेस्माअंतर्गत कारवाई करू' -

संपात उतरलेल्या संघटनांना विनंती आहे की त्यांनी चर्चेतून तोडगा काढावा. सध्या शेतीचा हंगाम आहे. दहावी आणि बारावीच्या परीक्षा सुरू आहेत. उन्हाळ्याचे दिवस आहेत. आम्ही चर्चेला तयार आहोत. आर्थिक संकटात असताना यावर मात करत आम्ही पुढे जात आहोत. कोरोना काळात वीज कर्मचाऱ्यांनी समोर येऊन सेवा केली हे मान्य आहे. आज वीज कर्मचाऱ्यांच्या संघटनांसोबत व्हिडिओ कॉन्फरन्सिंगच्या माध्यमातून चर्चा करणार आहोत. त्यावर तोडगा निघेल असं वाटतं. मात्र, कोणीही समजू नये की आम्ही संप करू तर आम्हाला कोणीही अडविणार नाही. सरकार कठोर होईल आणि मेस्माअंतर्गत कारवाई करू, असा इशारा नितीन राऊतांनी दिला आहे.

वीजनिर्मितीवर परिणाम होणार का? -

वीज निर्मितीवर याचा संपूर्ण परिणाम होणार आहे. वीज ग्रीडवर देखील परिणाम होईल. आमच्यासमोर कोळशाचं मोठं सकट आहे. नाशिकमध्ये दोन प्लांट बंद झालेत. त्यामुळे लोडशेडींग करण्यात आले. त्यामुळे कुठल्याही संघटनांनी राज्य सरकारला वेठीस धरू नये. एक पाऊल मी पुढे येतो आणि एक पाऊल तुम्ही पुढे या, असं आवाहन ऊर्जामंत्र्यांनी केलं आहे. तसेच संप कायम राहिल्यास वीजनिर्मितीवर परिणाम होईल, अशी चिंताही ऊर्जामंत्र्यांनी व्यक्त केली आहे.