"मनसेने राजकीय मोतीबिंदूची शस्त्रक्रिया करावी"; रोहित पवारांचा टोला

राज ठाकरेंचा अयोध्या दौरा स्थगित झाल्याप्रकरणी मनसेने आता राष्ट्रवादी काँग्रेसचे अध्यक्ष शरद पवार यांना मधे आणलं आहे. अयोध्या दौऱ्याला विरोध करणारे भाजपा खासदार बृजभूषण सिंह यांच्यासोबतचा शरद पवार आणि सुप्रिया सुळेंसोबतचा फोटो मनसेने शेअर केला आहे. याच प्रकरणावरून आता राष्ट्रवादीचे आमदार रोहित पवार यांनी मनसेला सुनावलं आहे. (MNS Shared photos of Sharad Pawar with Brijbhushan singh)

रोहित पवार (MLA Rohit Pawar) यांनी याबद्दल सोशल मीडियावर पोस्ट केली आहे. रोहित पवार म्हणाले, "राज ठाकरे साहेब राज्यातले मोठे नेते असून मला त्यांचा आदर आहे. पण भाजप आपला वापर करून घेतंय तरी मनसेला हे कसं कळत नसेल? खासदार बृजभूषण सिंह हे कोणत्या पक्षाचे आहेत, हे तरी मनसेनं बघावं आणि आगामी महापालिका निवडणुकीत ते मुंबईत प्रचाराला आले तर मनसेने आश्चर्य वाटून घेऊ नये.

शरद पवारांच्या फोटोबद्दल बोलताना रोहित पवार म्हणाले, "शरद पवार साहेब (NCP Chief Sharad Pawar) आणि खासदार बृजभूषण सिंह यांच्या एकत्रित फोटोचा....तर पवार साहेब हे अनेक वर्षे 'महाराष्ट्र कुस्तीगीर परिषदे'चे अध्यक्ष आहेत आणि खासदार बृजभूषण सिंह हे 'भारतीय कुस्ती संघा'चे अध्यक्ष आहेत. मनसेला खेळातही राजकारण दिसत असेल तर त्यांनी तातडीने आपल्या राजकीय मोतिबिंदूची शस्त्रक्रिया करून घ्यावी. यामुळं संभाव्य अपघात टळून स्वतःच्याच पक्षाचा बचाव तरी करता येईल."