सत्यमेव जयते ! खरं त्रासून जातं पण... ,सदाभाऊंचा आघाडीवर घणाघात

मुंबई: महाराष्ट्र विधीमंडळाच्या पावसाळी अधिवेशनात गदारोळ आणि गोंधळ घातलेल्या भाजपच्या १२ आमदारांचे निलंबन सुप्रीम कोर्टाकडून (Supreme Court) रद्द करण्यात आले. न्यायालयाच्या निर्णयावर भाजप आमदार आशिष शेलार (Ashish Shelar), विरोधी पक्षनेते देवेंद्र फडणवीस (Devendra Fadnavis) यांनी प्रतिक्रिया दिली आहे. दरम्यान, हमारे पार्टी का नाम सुनकर फ्लॅावर समझे क्या? फ्लॉवर नहीं फायर है..! असा पुष्पा या चित्रपटातील फेमस डायलाॅग ट्विट करत भाजपच्या चित्रा वाघ (Chitra Wagh) यांनी महाविकास आघाडीवर निशाणा साधला आहे. दरम्यान सत्यमेव जयते ! खरं त्रासून जातं पण शेवटी त्याचाच जय होतो, असा टोला रयत क्रांती संघटनेचे प्रमुख व आमदार सदाभाऊ खोत (Sadabhau Khot) यांनी महाविकास आघाडीवर लगावला आहे.

महाराष्ट्र विधीमंडळाच्या पावसाळी अधिवेशनात गदारोळ आणि गोंधळ घातल्याने भाजपच्या 12 आमदारांना निलंबित करण्यात आले होते. या निलंबित आमदारांनी याच्याविरोधात सुप्रीम कोर्टात धाव घेतली होती. आज (ता.२८) सुप्रीम कोर्टाकडून भाजपच्या १२ आमदारांचं निलंबन रद्द करण्यात आले आहे. न्यायालयाच्या निर्णयावर आज भाजपचे प्रमुख नेत्यांनी महाविकास आघाडीला धारेवर धरले आहे.

सदाभाऊ खोत यांनी ट्विट करत आघाडीवर घणाघात केला आहे. ते म्हणतात, सर्वोच्च न्यायालयाने 12 आमदाराचे निलंबन रद्द केले. हा आमचा विजय आहे. सत्यमेव जयते ! खरं त्रासून जातं पण शेवटी त्याचाच जय होतो. आणि याचाच प्रत्यय सर्वोच्च न्यायालयाच्या निकालाने आज येत आहे.