ओवैसींच्या कबर दर्शनावर संभाजीराजेंची पहिली प्रतिक्रिया; म्हणाले...

तेलंगणचे एमआयएमचे आमदार अकबरुद्दीन ओवैसी यांनी काल औरंगजेबाच्या कबरीचं दर्शन घेतलं. यावरून आता नवा वाद उद्भवला आहे. याच घटनेबद्दल छत्रपती शिवाजी महाराजांचे वंशज संभाजीराजे छत्रपती यांनी प्रतिक्रिया दिली आहे.

संभाजीराजे छत्रपती याविषयी माध्यमांशी बोलताना म्हणाले, "याबद्दल माझ्या कानावर संध्याकाळी आलं आहे की त्यांनी औरंगजेबाच्या कबरीच्या ठिकाणी गेले आणि चादर तिथे टाकली. कानावर आलंय असं माझ्या, पण मी त्याचा अभ्यास करतो. त्यावर अचानक प्रतिक्रिया देणं मला बरोबर वाटत नाही. पण जर खरंच तसं झालं असेल, तर असं करणं बरोबर नाही, योग्य नाही. शिवाजी महाराजांच्या भूमीत हे योग्य नाही."

तेलंगणमधले एमआयएमचे आमदार अकबरुद्दीन ओवैसी यांनी औरंगाबाद दौऱ्यावर असताना औरंगजेबाच्या कबरीचं दर्शन घेतलं. यावेळी त्यांच्याबरोबर खासदार इम्तियाज जलील हेही उपस्थित होते. याच प्रकरणावरून आता वादंग उठला आहे. विविध पक्षांच्या नेत्यांनी या कृतीचा निषेध केला आहे. मात्र खुल्ताबादमध्ये अनेक दर्गे आहेत, कोणीही तिथे गेलं, तर त्या कबरीचं दर्शन घेतंच, त्यामुळे कोणी त्यातून वाईट अर्थ काढू नये, अशी प्रतिक्रिया इम्तियाज जलील यांनी दिली आहे.