राज्यसभा नव्हे संपूर्ण महाराष्ट्रच! संभाजीराजे २०२४ च्या निवडणुकीच्या शर्यतीत?

संभाजीराजे छत्रपतींच्या खासदारकीचा मुद्दा सध्या ऐरणीवर आहे. शिवसेनेकडून राजेंना उमेदवारी देण्यासाठी पक्षप्रवेशाची अट घालण्यात आली होती. मात्र राजेंनी त्याला अप्रत्यक्षपणे नकार दिला. त्यानंतर शिवसेनेने कोल्हापुरातलाच दुसरा उमेदवार जाहीर केल्याने संभाजीराजेंची कोंडी करण्याचा प्रयत्न होत असल्याचं दिसतंय. दुसरीकडे संभाजीराजे समर्थकांनी आता हा मुद्दा लावून धरला आहे. (Sambhajiraje Chhatrapati)

संभाजीराजे समर्थकांनी एक पोस्टर सोशल मीडियावर व्हायरल केलेलं आहे. आता राज्यसभा नव्हे तर संपूर्ण राज्यच घेणार. इतिहासाची पुनरावृत्ती, महाराष्ट्रात स्वराज्याची निर्मिती, लक्ष २०२४ असा मजकूर छापण्यात आला आहे. यामुळे आता संभाजीराजे कोणती भूमिका घेणार? अपक्ष लढण्याच्या निर्णयावर ते ठाम राहणार का? संभाजीराजेंची पुढची रणनीती काय असे अनेक प्रश्न उपस्थित होत आहेत.

३ मे रोजी संभाजीराजेंच्या खासदारकीचा कार्यकाळ संपला. त्यानंतर त्यांनी स्वराज्य संघटनेची घोषणा केली आणि खासदारकीची निवडणूक अपक्ष लढणार असल्याचं जाहीर केलं. त्यानंतर त्यांनी सर्व पक्षांना पाठिंब्यासाठी आवाहन केलं. राष्ट्रवादीने संभाजीराजेंना पाठिंबा देण्याची तयारी दर्शवली. त्यानंतर त्यांनी चेंडू शिवसेनेच्या कोर्टात टोलवला.

शिवसेनेकडे असलेल्या दोन जागांपैकी एका जागेवर संजय राऊतांचं नाव फिक्स आहे. तर दुसऱ्या जागेसाठी संभाजीराजेंसोबत चर्चा सुरू होती. मात्र शिवसेनेचा पाठिंबा मिळवण्यासाठी संभाजीराजेंना पक्षप्रवेशाची अट घालण्यात आली होती. त्यांनी या अटीवर प्रत्यक्ष कोणतीच भूमिका घेतली नाही. त्यानंतर आता काल शिवसेनेने कोल्हापुरातल्याच दुसऱ्या नेत्याला उमेदवारी दिल्याचं जाहीर केलं आहे.