Sanjay Rathod : मंत्रीपदावरून पुजा चव्हाणच्या आजीचा संताप; म्हणाल्या...''सरकारने त्यांची...''

Sanjay Rathod Latest News : राज्यातील मंत्रिमंडळातील काही मंत्र्यांना देण्यात आलेल्या संधीनंतर आता नव्या नाराजी नाट्याला सुरुवात झाली आहे. यामध्ये पुजा चव्हाण या मुलीच्या मृत्यूनंतर चर्चेत आलेल्या संजय राठोड यांच्या नावावरून विरोधकांसह भाजपच्या चित्रा वाघ यांनी उघड नाराजी व्यक्त केली आहे. त्यानंतर आता पुजा चव्हाणच्या आजीनेदेखील यावर संतप्त प्रतिक्रिया देत आपला रोश व्यक्त केला आहे.

संजय राठोड यांनी मंत्रिपदाची शपथ घेतल्यानंतर पुजाच्चा आजीने म्हटले आहे की, “या सरकारने संजय राठोडची आरती करावी म्हणजे त्यांना चांगलं वाटेल”, अशा संतप्त शब्दात आपल्या भावना व्यक्त केल्या आहेत. पूजा चव्हाण या तरुणीची आजी शांताबाई राठोड यांनी पत्रकारांशी बोलताना वरील नाराजी व्यक्त केली आहे. दरम्यान, राज्यात नव्याने आलेल्या सरकारकडून तरी पूजा चव्हाण प्रकरणात न्याय मिळेल अशी आशा होती. मात्र, मंत्रिमंडळाचा जो काही विस्तार झाला आणि त्यात राठोड यांना देखील संधी देण्यात आली आहे. त्यामुळे अनेकांच्या भुवया उंचावल्या आहेत.

टिकटॉक स्टार पूजा चव्हाण हिच्या आत्महत्येप्रकरणी पोलिसांनी संजय राठोड (Sanjay Rathod) यांच्यावर कारवाई केली होती. यामुळे त्यांना महाविकास आघाडी सरकारमध्ये असताना मंत्रिपदाचा राजीनामा द्यावा लागला होता. आता शिंदे सरकारमध्ये मंत्री झाल्यानंतर त्यांच्यावर विरोधक व भाजपच्या चित्रा वाघ यांच्याकडून हल्ला करण्यात येत आहे.

कायदेशीर मार्ग अवलंबावा लागेल

लोकशाहीमध्ये सर्वांना बोलण्याचा अधिकार आहे. मात्र, चित्रा वाघ माझ्यावर सातत्याने हल्ला करीत आहे. चित्रा वाघ यांना या प्रकरणाशी संबंधित कागदपत्रे मिळाली नसावी. त्यांना ती पाठवण्याची व्यवस्था करतो. आतापर्यंत शांत होते. असेच सुरू राहिले तर कायदेशीर मार्ग अवलंबावा लागेल. नोटीसही द्यावी लागले, असा अप्रत्यक्ष इशारा संजय राठोड यांनी चित्रा वाघ यांना दिला आहे.