Shahaji Patil : 'शहाजीबापू संत्रा पिऊन बोलतात की हातभट्टीवरील तांब्या मारून बोलतात, हेच कळत नाही'

सोलापूर : महाराष्ट्रात राजकीय उलथापालथ झाल्यानंतर उध्दव ठाकरे (Uddhav Thackeray) गट आणि शिंदे गट आमनेसामने आहेत. दोघांत आरोप-प्रत्यारोपाच्या फैरी सुरु आहेत. एकनाथ शिंदेंनी (Eknath Shinde) शिवसेनेत (Shiv Sena) बंडखोरी केल्यानंतर राज्याचं राजकारण बदलून गेलंय. त्याच आता सेनेच्या शरद कोळी (Sharad Koli) यांनी आमदार शहाजी पाटील (Shahaji Bapu Patil) यांच्यावर जोरदार टीका केलीय.

उद्धव ठाकरे आणि आदित्य ठाकरे (Aditya Thackeray) यांना मी सांगोल्यात भाड्याने दोन बंगले घेऊन देईन, अशी टिप्पणी करणारे एकनाथ शिंदे गटाचे आमदार शहाजीबापू पाटील यांच्यावर शरद कोळी यांनी जळजळीत शब्दांत टीका केलीय. शहाजीबापू हे त्यांच्याकडं बायकोला लुगडं घ्यायला पैसे नाहीत, असं सांगतात. एवढंच नव्हे तर हातभट्टीची दारु प्यायल्यानंतर शहाजी पाटील त्याचं बिलही दुसऱ्याला भरायला लावतात. ते शहाजीबापू उद्धव ठाकरे आणि आदित्य ठाकरेंना काय घर बांधून देणार, असा टोला कोळी यांनी लगावलाय.

ते शुक्रवारी सोलापूरमध्ये प्रसारमाध्यमांशी बोलत होते. यावेळी शरद कोळींनी शहाजी पाटलांचे अक्षरश: वाभाडेच काढले. आमदार होण्यासाठी शहाजीबापू मातोश्रीसमोर जाऊन नाक घासत होते, याचा त्यांना विसर पडलाय. शहाजी पाटलांनी वायफळ बडबड बंद करावी, अन्यथा तुमच्या घरावर शिवसेना स्टाईलनं उत्तर देऊ, असा इशाराही शरद कोळी यांनी दिलाय. ते संत्रा पिऊन बोलतात की हातभट्टीवरील तांब्या मारून बोलतात, नेमकं तेच कळत नाही, अशी बोचरी टीकाही कोळींनी शहाजीबापूंवर केलीय.