आमचे मालक सदावर्ते, कृती समितीसोबत देणंघेणं नाही - कर्मचारी|ST Employee Strike | Sakal
sakal

बोलून बातमी शोधा

ST Employee Strike

आमचे मालक सदावर्ते, कृती समितीसोबत देणंघेणं नाही - कर्मचारी

मुंबई : एसटी कर्मचाऱ्यांच्या संपावर (ST Employee Strike) तोडगा काढण्याच्या उद्देशाने आज राष्ट्रवादीचे अध्यक्ष शरद पवार (Sharad Pawar), परिवहन मंत्री अनिल परब (Minister Anil Parab) यांच्यासोबत कृती समितीची बैठक झाली. त्यानंतर कर्मचाऱ्यांना कामावर परत येण्याचं आवाहन करण्यात आलं. पण, आमचे आणि बैठकीचे काहीही देणंघेणं नाही, असं म्हणत कर्मचारी संपावर ठाम असल्याचं त्यांनी सांगितलं.

हेही वाचा: शरद पवार यांच्या उपस्थितीत आज एसटी संपाबाबत कृती समितीची बैठक

'आम्हाला विलनीकरण हवं' -

कृती समितीसोबत घेतलेल्या बैठकीसोबत आमचे काहीही देणेघेणे नाही. त्या बैठकीला आमचे वकील गुणरत्न सदावर्ते उपस्थित नव्हते. ज्यांना आम्ही संपातून बाहेर काढले त्या रिकाम्या लोकांसोबत सरकारने बैठक घेतली. आम्हाला विलनीकरण हवं आहे बाकी काहीही नको, अशी ठाम भूमिका एसटी कर्मचाऱ्यांनी मांडली.

बैठक घ्यायची असेल तर सदावर्तेसोबत घ्या -

कृती समितीचे सदस्य अजय गुजर यांनी गुणरत्न सदावर्ते यांची वकीली मागे घेतली असल्याची माहिती दिली. त्याबाबत बोलताना कर्मचारी म्हणाले, आम्ही १ लाख कर्मचाऱ्यांनी सदावर्ते यांना निवड आहे. कृती समितीचे आमची पुढारी म्हणून वागू नये. आमच्या कर्मचाऱ्यांचा जीव गेल्यानंतर यांना बैठक घेण्याची जाग आली का? बैठक घ्यायची असेल तर सदावर्ते यांच्यासोबत घ्या. आमचे मालक फक्त न्यायालय आणि सदावर्ते आहेत, असंही कर्मचारी म्हणाले. तसेच त्यांनी सरकार आमिष दाखवत असल्याचा आरोप केला.

कर्मचाऱ्यांना कामावर परत येण्याचं आवाहन -

एसटी कर्मचाऱ्यांच्या संपावर तोडगा काढण्यासाठी झालेल्या बैठकीत सकारात्मक चर्चा झाल्याची माहिती कृती समितीने दिली. आम्ही २० डिसेंबरला संप मागे घेतला होता. कर्मचाऱ्यांच्या बहुतांश अडचणी सोडवलेल्या आहेत. लवकरच बैठक घेऊन सातव्या वेतन आयोगाप्रमाणे पगारावर चर्चा होणार आहे. आता शरद पवारांनी शब्द दिला आहे. त्यामुळे कर्मचाऱ्यांनी संप मागे घ्यावा आणि कामावर परतावं, असं आवाहन अजय गुजर यांनी केलं. तसेच त्यांनी गुणरत्न सदावर्ते यांच्यावर देखील टीका केली. कर्मचाऱ्यांना भडकविण्याचं काम सुरू असून सदावर्तेंच्या आक्रस्ताळेपणामुळे कर्मचाऱ्यांची रोजीरोटी बंद होण्यीची वेळ आली आहे, असं ते म्हणाले.

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
loading image
go to top