Vinayak Mete Death: मला साहेबांना शेवटचं भेटू द्या; चालकाने फोडला होता टाहो

शिवसंग्राम संघटनेचे नेते विनायक मेटे यांच्यावर काल बीडमध्ये अंत्यसंस्कार करण्यात आले. मुंबई पुणे दृतगती मार्गावर झालेल्या अपघातात त्यांचं निधन झालं होतं. रुग्णालयात उपचार घेत असलेल्या मेटेंच्या चालकाने काल टाहो फोडला, त्याला अश्रू अनावर झाले.

विनायक मेटेंच्या गाडीचे चालक एकनाथ कदम यांच्यावर पनवेलच्या एमजीएम रुग्णालयात उपचार सुरू आहेत. मेटेंच्या अंत्यसंस्कारासाठी मला जाऊ द्या, असं म्हणत त्यांनी टाहो फोडला आहे. मला इथं का ठेवलं आहे, मला काही होत नाहीये, मला साहेबांचं शेवटचं दर्शन घेऊ द्या, मला त्यांच्या अंत्यसंस्काराला जाऊ द्या, असं म्हणत त्यांना अश्रू अनावर झाले.

यावेळी पोलिसांनाही कदम यांना आवरणं शक्य होत नव्हतं. कदम यांच्या चौकशीसाठी पोलीस तिथे आले होते. यावेळी कदम यांनी पोलिसांकडे विनवणी केली. रविवारी १४ ऑगस्ट रोजी दृतगती मार्गावर मेटेंचा अपघात झाला. अपघातानंतर तास-दीड तास कोणतीही मदत मिळाली नसल्याचा आरोप त्यांच्या गाडीचे चालक एकनाथ कदम यांनी केला होता.