Weather Update: कोकणासह मराठवाडा विदर्भात पावसाची शक्यता; तर राज्याच्या काही भागात उष्णतेची लाट, वाचा हवामान विभागाचा अंदाज

राज्यात गेल्या काही दिवसांमध्ये अवकाळी पावसाने हजेरी लावली आहे. अनेक भागात वादळी वाऱ्यासह गारपीट झाली आहे. तर काही भागामध्ये उष्णतेचा कहर दिसून येत आहे. दरम्यान हवामान विभागाने राज्यात पुण्यासह १२ जिल्ह्यांमध्ये आज शनिवारी (ता. २०) हवामान खात्याने वादळी वाऱ्यासह पावसाचा ‘यलो अलर्ट’ दिला आहे.

मध्य महाराष्ट्र, मराठवाडा आणि विदर्भातील जिल्ह्यांचा यात समावेश आहे. दरम्यान, राज्यातील बहुतांश भागात उन्हाचा चटका कायम राहण्याची शक्यता आहे. राज्यात सर्वाधिक तापमान अकोल्यात ४४ अंश सेल्सिअस नोंदले गेले आहे.

मराठवाडा आणि परिसरावर समुद्रसपाटीपासून चक्राकार वाऱ्यांची स्थिती आहे. त्यापासून कर्नाटक, दक्षिण तमिळनाडूपर्यंत वाऱ्यांचे प्रवाह खंडित झाल्याने कमी दाबाचा पट्टा सक्रिय आहे. यामुळे राज्यात पावसाला पोषक हवामान झाले आहे. येत्या शनिवारी (ता. २०) मध्य महाराष्ट्रातील धुळे, जळगाव, नाशिक, नगर, पुणे, सोलापूर, सांगली, मराठवाड्यातील धाराशिव, लातूर, नांदेड, विदर्भातील चंद्रपूर, गडचिरोली जिल्ह्यांत वादळी वारे, विजांसह पावसाचा इशारा देण्यात आला आहे.

वादळी पावसाचा इशारा (येलो अलर्ट)

धुळे, जळगाव, नाशिक, नगर, पुणे, सोलापूर, सांगली, धाराशिव, लातूर, नांदेड, चंद्रपूर, गडचिरोली.

तर महाराष्ट्रातील काही भागांमध्ये उष्णतेची लाट दिसून येते आहे. उत्तर महाराष्ट्र आणि मराठवाड्यातील अनेक जिल्ह्यांमध्ये सध्या तापमान हे 40 अंश सेल्सिअसच्या पुढे आहे.