'हटाओ इसे,क्या बनाया है'; लाल सिंग चड्ढा एडिट करण्याचा आईचा आमिरला सल्ला?

बॉलीवूड अभिनेता आमिर खान(Aamir Khan) सिने इंडस्ट्रीत परफेक्शनिस्ट म्हणून ओळखला जातो. एक उत्तम कलाकार म्हणून त्यानं स्वतःची ओळख खूप भक्कम बनवली आहे. आमिरचा तब्बल तीन-चार वर्षांनी 'लाल सिंग चड्ढा' सिनेमा मोठ्या पडद्यावर आपल्या भेटीस येत आहे. त्यानं सिनेमातलं 'कहानी' हे गाणं सोशल मीडियावर नाही तर रेडिओवर हटके अंदाजात लॉंच केलं. यावेळी दिलेल्या मुलाखतीत त्यानं आपली आई झीनत हुसैनला जर सिनेमा आवडला नाही तर ती काय प्रतिक्रिया देते याविषयीनं अभिनेत्यानं मोठा खुलासा केला आहे.

आमिरचा 'लाल सिंग चड्ढा' सिनेमातलं 'कहानी' गाणं रेडिओवर लॉंच झाल्यावर आता त्याला पसंतीची दाद चाहत्यांकडून मिळताना दिसत आहे. या गाण्याला अमिताभ भट्टाचार्यने लिहिलं आहे. तर मोहन कनननं ते गाणं गायलं आहे. त्याच गाण्याच्या लॉंचला रेडिओ स्टेशनवर गेलेल्या आमिरनं आपल्या आईच्या सिनेमा पाहून प्रतिक्रिया देण्याविषयी मोठा खुलासा केला आहे. तो म्हणाला आहे, ''जेव्हा आईला माझा सिनेमा आवडत नाही तेव्हा ती लगेच म्हणते,'हटाओ इसको,क्या बनाया है?' अगदी क्यूट अंदाजात ती हे म्हणते'', असंही आमिर पुढे म्हणाला.

आमिर म्हणाला,''लाल सिंग चड्ढा आईला दाखवताना मनात धाकधूक होती. ती काय म्हणेल याची. नशिबानं ती म्हणाली नाही,'हटाओ इसे,क्या बनाया है'. ती म्हणाली,''आमिर तू कोणाचंच ऐकू नकोस. फिल्म मस्त बनली आहे,आहे तशी रिलीज कर. यात काहीच एडिट करू नकोस''. आमिरनं आवर्जुन नमूद केलं की सिनेमासाठी मला माझ्या आईची प्रतिक्रिया खूप महत्त्वाची ठरते.

आमिर खान आणि करिना कपूर खान अभिनित 'लाल सिंग चड्ढा' सिनेमा १९९४ मध्ये प्रदर्शित झालेल्या हॉलीवूडच्या 'फॉरेस्ट गंप' या सिनेमाचा हिंदी रीमेक आहे. लाल सिंग चड्ढा सिनेमात नागा चैतन्य,मोना सिंग यांच्या देखील महत्त्वाच्या भूमिका आहेत. हा सिनेमा ११ ऑगस्ट रोजी सिनेमागृहात प्रदर्शित होणार आहे. अंद्वैत चंदननं या सिनेमाचं दिग्दर्शन केलं आहे.