'छिछोरे'मधील अभिनेत्री अभिलाषा पाटील यांचे कोरोनाने निधन

मराठी अभिनेत्री अभिलाषा पाटील Abhilasha Patil यांचे कोरोनामुळे निधन झाले. अभिलाषा यांनी दमदार अभिनयकौशल्याच्या जोरावर अनेक भूमिका गाजवल्या आहेत. 'बायको देता का बायको', 'प्रवास' यांसारख्या मराठी चित्रपटांमध्ये त्यांनी भूमिका साकारल्या. तर सुशांत सिंह राजपूत आणि श्रद्धा कपूरच्या 'छिछोरे' chhichhore या चित्रपटातही त्यांनी भूमिका साकारली होती. चित्रपटांसोबतच त्यांनी मालिकांमध्येही काम केलं. 'बापमाणूस' या मालिकेतील त्यांची भूमिका लक्षवेधी ठरली होती. (actress abhilasha patil passes away due to covid 19)

अभिलाषा या वाराणसीमध्ये त्यांच्या आगामी चित्रपटाची शूटिंग करत होत्या. शूटिंगनंतर जेव्हा त्या मुंबईत परतल्या, तेव्हा त्यांना कोरोनाची लागण झाली. कोरोनाची लक्षणे दिसताच त्यांनी चाचणी केली आणि त्याचा रिपोर्ट पॉझिटिव्ह आला. अभिलाषा आधी घरीच क्वारंटाइनमध्ये होत्या. मात्र तब्येत बिघडताच त्यांना रुग्णालयात दाखल करण्यात आलं. गेल्या काही दिवसांत त्यांची प्रकृती आणखी खालावली. अखेर मंगळवारी त्यांची प्राणज्योत मालवली. अभिलाषा यांच्या निधनाने मराठी आणि बॉलिवूड इंडस्ट्रीवर शोककळा पसरली आहे. सोशल मीडियाद्वारे अनेकांनी त्यांना श्रद्धांजली वाहिली आहे.

हेही वाचा : गोव्यात 'सूर नवा ध्यास नवा'चं शूटिंग पाडलं बंद; सेटवर आमदारांचा गोंधळ

अभिलाषा यांनी 'छिछोरे' या हिंदी चित्रपटासोबतच वरुण धवन आणि आलिया भट्टच्या 'बद्रिनाथ की दुल्हनियाँ', अक्षय कुमारच्या 'गुड न्यूज' आणि 'मलाल' यांमध्येही काम केलं होतं.