आलियाने कोरोना नियमावलीचं उल्लंघन केलं नाही- BMC

निर्माता, दिग्दर्शक करण जोहरच्या (Karan Johar) घरी झालेल्या पार्टीनंतर काही बॉलिवूड सेलिब्रिटींना कोरोनाची लागण झाली. त्यातच अभिनेत्री आलिया भट्टने (Alia Bhatt) होम क्वारंटाइनच्या नियमांचं उल्लंघन केल्याचं म्हटलं जात होतं. मात्र आलियाचा कोरोना चाचणीचा रिपोर्ट निगेटिव्ह असल्याने तिच्याकडून क्वारंटाइन नियमांचं उल्लंघन झालं नाही, असं मुंबई महानगरपालिकेच्या वरिष्ठ अधिकाऱ्याने स्पष्ट केलं. पीटीआयने दिलेल्या वृत्तानुसार, मुंबईबाहेर जाताना आलियाने कोरोना चाचणी केली होती आणि त्याचा रिपोर्ट निगेटिव्ह आला होता. आलिया तिच्या आगामी 'ब्रह्मास्त्र' या चित्रपटाच्या प्रमोशनसाठी दिल्लीला गेली होती. "रिपोर्ट निगेटिव्ह असताना प्रवास केला असेल तर कोणतीही कारवाई होऊ शकत नाही", असं अधिकाऱ्यांनी सांगितलं.

'कभी खुशी कभी गम' या चित्रपटाला २० वर्षे पूर्ण झाल्याच्या निमित्ताने करणने त्याच्या घरी पार्टीचं आयोजन केलं होतं. या पार्टीमध्ये आलियासह करीना कपूर, अमृता अरोरा, महीप कपूर, सीमा खान यांच्यासह इतरही सेलिब्रिटी होते. पार्टीनंतर करीना, सीमा, अमृता आणि महीप यांना कोरोनाची लागण झाली. करण जोहरसह या पार्टीला उपस्थित असलेल्या सर्वांची कोविड १९ चाचणी करण्यात आली. करीना आणि अमृता यांनी घरातच स्वत:ला क्वारंटाइन केलं आहे. सात दिवसांनी त्यांची पुन्हा चाचणी करण्यात येणार आहे. या दोघींच्या फ्लॅट्स टाळेबंद करण्यात आल्या असून त्यांच्या संपर्कात आलेल्या ३० जणांची कोरोना चाचणी करण्यात आली आहे.

संजय कपूर यांची मुलगी शनाया कपूर आणि सोहैल खानच्या १० वर्षांच्या मुलालादेखील कोरोनाची लागण झाली आहे. करण जोहरसह त्याच्या कुटुंबीयांची RTPCR चाचणी करण्यात आली असता सर्वांचा रिपोर्ट निगेटिव्ह आला आहे.

करण जोहरने माध्यमांना फटकारलं-

'माध्यमांच्या काही सदस्यांना मी सांगू इच्छितो की ८ जण एकत्र आले की पार्टी होत नाही आणि माझं घर हे काही कोविडचं हॉटस्पॉट नाही. आम्ही घरात काटेकोरपणे नियमांचं पालन करतो. आम्ही सर्वजण जबाबदार नागरिकांप्रमाणे वागतोय आणि मास्कचा सतत वापर करतोय. तथ्य काय आहे याची पडताळणी न करता वृत्त देणाऱ्या काही माध्यमांच्या सदस्यांना माझी विनंती आहे की त्यांनी संयम बाळगावा', अशी पोस्ट करण जोहरने लिहिली होती.