'तुम्हाला गृहित धरणार नाही'; चाहत्यांच्या गोंधळानंतर अल्लू अर्जुनची सारवासारव

दाक्षिणात्य चित्रपटसृष्टीतील सुपरस्टार अल्लू अर्जुनच्या (Allu Arjun) एका कार्यक्रमात चाहत्यांनी गोंधळ घातला. सोमवारी १३ डिसेंबर रोजी अल्लू अर्जुनने चाहत्यांसोबतची भेट आणि फोटो सेशन रद्द केल्यामुळे जमा झालेले चाहते संतापले. त्यामुळे सायबराबादमधील एन-कन्व्हेन्शन सेंटरमध्ये तणाव वाढला. अल्लू अर्जुनच्या आगामी 'पुष्पा' (Pushpa) या चित्रपटाच्या प्रदर्शनाच्याआधी आयोजकांनी कन्व्हेन्शन सेंटरमध्ये एक कार्यक्रम आयोजित केला होता. यावेळी फक्त २०० लोकांची व्यवस्था करण्यात आली होती. मात्र कार्यक्रमस्थळी अल्लू अर्जुनला भेटण्यासाठी मोठी गर्दी झाली होती. या गोंधळामुळे आयोजकांनी कार्यक्रम रद्द केला. अखेर चिडलेल्या चाहत्यांनी कार्यक्रमाच्या ठिकाणी मालमत्तेचं नुकसान केलं.

या गोंधळात काही चाहते जखमी झाले. संबंधित घटनेविषयी अल्लू अर्जुनने ट्विट केलं. 'माझ्या कार्यक्रमातील गोंधळामुळे काही चाहत्यांना दुखापत झाली. माझी टीम वैयक्तिकरित्या परिस्थितीवर लक्ष ठेवून आहे आणि मला अपडेट देत आहे. यापुढे, अशा घटना घडू नयेत यासाठी मी खूप काळजी घेईन. तुमचं प्रेम ही माझी सर्वात मोठी संपत्ती आहे आणि मी त्याला कधीही गृहीत धरणार नाही', असं अल्लू अर्जुनने लिहिलं.

चाहत्यांच्या गोंधळात पोलिसांनी हस्तक्षेप करून परिस्थिती नियंत्रणात आणली. पोलिसांनी कार्यक्रमाच्या आयोजकांवर गुन्हा दाखल केला आहे. आणखी एका घटनेत मित्री मूव्ही मेकर्सविरोधात पोलिसांनी गुन्हा दाखल केला आहे. रविवारी आयोजित करण्यात आलेल्या कार्यक्रमात ५ हजार लोकांनी परवानगी असताना १५ हजारहून अधिक लोक जमा झाले होते.

आगामी 'पुष्पा' या चित्रपटात अल्लू अर्जुन आणि रश्मिका मंदाना यांच्या मुख्य भूमिका आहेत. याशिवाय जगपती बाबू, प्रकाश राज, धनंजय, अनसूया भारद्वाज, हरीश उथमन आणि वेनेला किशोर यांनी चित्रपटात सहाय्यक भूमिका केल्या आहेत.