किरण खेर यांच्या प्रकृतीविषयी अफवा; अनुपम खेर यांची नेटकऱ्यांना विनंती

सध्या कोरोनाच्या काळात अनेक दिग्ग्जांच्या निधनाच्या अफवांना पेव फुटले आहेत. ज्येष्ठ अभिनेते अनुपम खेर Anupam Kher यांच्या पत्नी आणि अभिनेत्री किरण खेर Kirron Kher यांच्या निधनाच्या चर्चा शुक्रवारी संध्याकाळापासून होऊ लागल्या. त्यावर खुद्द अनुपम खेर यांनी पोस्ट लिहित चर्चांना पूर्णविराम दिला आहे. त्याचप्रमाणे अशा पद्धतीने नकारात्मक बातम्या पसरवू नका, अशी विनंती त्यांनी चाहत्यांना केली आहे. याआधी अभिनेत्री मिनाक्षी शेषाद्री, तबस्सुम, गायक लकी अली, रामायणातील अभिनेते अरविंद त्रिवेदी यांच्याही निधनाच्या अफवा सोशल मीडियावर व्हायरल झाल्या होत्या. (Anupam Kher dismisses rumours about his wife Kirron Kher health)

अनुपम खेर यांची पोस्ट-

'किरणच्या प्रकृतीविषयी अफवा पसरत आहे. ते सर्व चुकीचं आहे. तिची प्रकृती ठीक आहे आणि आज दुपारीच तिने कोरोना प्रतिबंधक लशीचा दुसरा डोस घेतला. मी लोकांना विनंती करतो की त्यांनी अशा प्रकारच्या नकारात्मक बातम्या पसरवू नये', अशी पोस्ट खेर यांनी लिहिली.

हेही वाचा : 'मदत करण्याची इच्छा आहे पण, सोनूनं मांडली व्यथा'...

शुक्रवारी अनुपम खेर आणि किरण खेर यांनी लशीचा दुसरा डोस घेतला. त्याचा फोटो त्यांनी इन्स्टाग्रामवर पोस्ट केला होता. किरण यांना कॅन्सरचं निदान झाल्यानंतर पहिल्यांदाच त्या सार्वजनिकरित्या समोर आल्या होत्या. किरण यांना ब्लड कॅन्सर झाल्याची माहिती अनुपम खेर यांनी एप्रिलमध्ये दिली होती. किरण यांना मल्टिपल मायलोमा या प्रकारचा ब्लड कॅन्सर आहे. गेल्या काही महिन्यांपासून त्यांच्यावर उपचार सुरू आहेत.