Baipan Bhaari Deva: "मराठी कार्यक्रमात हिंदी कलाकारांचे प्रमोशन पण..." दिग्दर्शक केदार शिंदेंनी सांगितली मनातली खंत

जसं बॉलिवूडमध्ये सनी देओलचा गदर2 आणि अक्षय कुमारचा OMG2 हा सिनेमा बॉक्स ऑफिसवर धुमाकूळ घालत आहे तसचं मराठी मनोरंजन विश्वात एक सिनेमा धुमाकूळ घालत आहेत. त्याचं नाव म्हणजे 'बाईपण भारी देवा'. या चित्रपटाच्या यशाचं कारण ठरलं ते चित्रपटाची हलकी फुलकी स्टोरी आणि चित्रपटाला मिळालेली माऊथ पब्लिसिटी.

बाईपण भारी देवा चित्रपट रिलीज बॉक्स ऑफिसवर इतका धुमाकूळ घालेल असं चित्रपटाचे निर्माते आणि केदार शिंदे यांना देखील वाटलं नसावं.

चित्रपटाला मिळालेल्या यशानंतर दिग्दर्शक केदार शिंदे आणि चित्रपटातील कलाकारांची टीम बरेच कार्यक्रम आणि पार्टीमध्ये हजेरी लावताना दिसत आहे. आता बाईपण भारी देवाच्या टीमने सोनी वाहिनीवरील 'इंडिया बेस्ट डान्सर'च्या शोमध्ये हजेरी लावली. या शोमध्ये जात त्यांनी कार्यक्रमाची रंगत वाढली.

दरम्यान दिग्दर्शक केदार शिंदे यांनी या कार्यक्रमाच्या सेटवरील काही फोटो सोशल मीडियावर शेयर केले आहेत. ज्याच्या कॅप्शन त्यांनी प्रेक्षकांचे आभार मानले आणि पुन्हा प्रेक्षकांचे लक्ष वेधले आहे.

या पोस्टच्या कॅप्शनमध्ये ते लिहितात की, "काल सोनी टिव्हीच्या 'इंडिया बेस्ट डान्सर 5' या कार्यक्रमात 'बाईपण भारी देवा' टीमला खास निमंत्रित केलं होतं. फारच अभिमान वाटतो. मराठी सिनेमा जेव्हा त्यांच्या व्यासपिठावर जावून आपला डंका वाजवतो तेव्हा ऊर भरून येतो. मला वाटतं याआधी सैराट या सिनेमाच्या टीमला कपिल शर्मा शो साठी बोलवलं गेलं होतं.

आपल्या मराठी कार्यक्रमात हिंदी कलाकारांचे प्रमोशन आपण करतो मात्र हे आपल्या बाबतीत हिंदीत फार होताना दिसत नाही. याचं शल्य मनात नक्कीच आहे. 'बाईपण भारी देवा'चं संपुर्ण यश हे तुम्हा मायबाप प्रेक्षकांचं आहे. आम्ही फक्त तुमचे प्रतिनिधी आहोत."

'इंडिया बेस्ट डान्सर' शो मध्ये बाईपण भारी देवाचे दिग्दर्शक केदार शिंदेंबरोबर शिल्पा नवलकर, दीपा परब, वंदना गुप्ते आणि सुचित्रा बांदेकर यांनी देखील शोमध्ये हजेरी लावली. यावेळी त्यांनी चित्रपटातील 'मंगळागौर' गाण्यावर डान्सही केला. त्याचे व्हिडिओ देखील सोशल मीडियावर व्हायरल झाले होते.