दीपिका पदुकोण म्हणाली,'प्रेमात तीन गोष्टी महत्त्वाच्या';वाचा सविस्तर

'व्हॅलेंटाईन डे'(Valentine Day) ला काही दिवस उरले असतानाच दीपिका पदूकोणचा(Deepika Padukone) 'गहराइयां'(Gehraiyaan) सिनेमाही प्रदर्शनासाठी तयार आहे. या सिनेमात दीपिका अभिनेता सिद्धांत चतुर्वेदीसोबत रोमान्स करताना दिसणार आहे. दीपिकानं या सिनेमाच्या प्रमोशन निमित्तानं दिलेल्या एका मुलाखतीत प्रेम,प्रेमातील नातं यावर भरभरुन संवाद साधला आहे. नातं टिकवण्यासाठी त्यात 'विश्वास' महत्त्वाचा हा एक महत्त्वाचा संदेश दीपिकानं दिला आहे. प्रेमाच्या नात्याविषयी बोलताना दीपिका म्हणाली,जेव्हा तुम्ही एखाद्यासोबत प्रेमाच्या नात्यात असता तेव्हा गरजेचं नाही की सगळ्याच बाबतीत तुमचे विचार सारखे असावेत. तिथे फक्त महत्त्वाचं आहे त्या प्रेमाच्या व्यक्तीविषयीच्या तुमच्या निर्मळ भावना आणि विश्वास. त्या दोन व्यक्तींमध्ये संवाद असणं महत्त्वाचं,तुम्ही एकमेकांपासून काही लवपून ठेवू नका. प्रेमात खरं बोला. तरंच ते नातं टिकेल आणि तुम्हालाही आनंद देईल.

याच मुलाखतीत, 'तुझ्यासाठी प्रेम म्हणजे काय?' असा प्रश्न विचारला तेव्हा ती म्हणाली की,'' याचं उत्तर तसं पटकन देता येणार नाही. प्रेमातील भावना शब्दात मांडणं तसं कठीण. प्रत्येकाच्या प्रेमाविषयीच्या भावना वेगवेगळ्या असू शकतील. पण माझं विचाराल तर मला प्रेमात विश्वास,मैत्री आणि संवाद या तीन गोष्टी महत्त्वाच्या वाटतात. जेव्हा तुम्ही १९ किंवा २१ वर्षांचे असता त्या वयातलं प्रेम खूप वेगळं असतं पण जसजसे तुम्ही मोठे होता तेव्हा प्रेमाची परिभाषा तुमच्यासाठी बदलत जाते.त्याचवेळी तिनं सांगितलं की मी माझ्या 'गहराइयां' सिनेमाच्या प्रदर्शनाची आतुरतेने वाट पहात आहे. या सिनेमात प्रेम पहायला मिळेलच पण त्याचवेळी प्रेमाच्या नात्यातल्या त्या कठीण वळणांवरही भाष्य केलेलं पहायला मिळणार आहे. हा सिनेमा ११ फेब्रुवारीला अॅमेझॉन प्राइमवर प्रदर्शित केला जाणार आहे. त्यामुळे समस्त प्रेमवीरांसाठी हा सिनेमा म्हणजे मनोरंजनाची व्हॅलेंटाइन ट्रीट ठरणार हे नक्की.