'१४ वर्षांच्या सहवासात दोन पाहुणे घराबाहेरच ठेवले'; पत्नीसाठी अमोल कोल्हेंची खास पोस्ट

अभिनेते आणि खासदार अमोल कोल्हे Amol Kolhe यांनी लग्नाच्या वाढदिवसानिमित्त पत्नीसाठी फेसबुकवर खास पोस्ट लिहिली आहे. पत्नी अश्विनी कोल्हे Ashwini Kolhe यांच्यासोबतचे काही फोटो पोस्ट करत त्यांनी ही पोस्ट लिहिली. अभिनेता ते यशस्वी राजकारणी, या अमोल कोल्हेंच्या प्रवासात त्यांच्या पत्नीचा मोलाचा वाटा आहे. अमोल आणि अश्विनी यांच्या लग्नाला १४ वर्षे पूर्ण झाली असून या १४ वर्षांच्या सहवासाचं फलित नक्कीच चांगलं आहे, अशी भावना त्यांनी या पोस्टमधून व्यक्त केली.

अमोल कोल्हेंची पोस्ट-

'१४ वर्षांच्या वनवासाचं फलित काय असतं ते माहित नाही, पण १४ वर्षांच्या सहवासाचं फलित नक्कीच चांगलं आहे. माणूस म्हणून समृद्ध होणं, संसाराच्या परिघात व्यक्तिस्वातंत्र्याचा आदर करणं, परस्परपूरक भूमिका घेणं या प्रत्येक गोष्टीत आणखी सुधारणा होत असताना, दोन पाहुणे मात्र आजवर घराबाहेरच ठेवले आहेत ताटकळत.. १) 'तू चूक' आणि २) 'मीच बरोबर'. कारण तेवढं केलं की सहवासाबरोबरच विरहाच्याही प्रत्येक क्षणाचा सोहळा होतो. समाधानाच्या उंबरठ्याच्या आत सुख नांदतं यावरचा विश्वास दृढ करणाऱ्या सहचारिणीस लग्नाच्या वाढदिवसाच्या मनःपूर्वक शुभेच्छा,' अशा शब्दांत त्यांनी भावना व्यक्त केल्या आहेत.

अश्विनी यासुद्धा डॉक्टर आहेत. अमोल आणि अश्विनी यांना आद्या आणि रुद्र ही दोन मुलं आहेत. आद्याने 'स्वराज्यरक्षक संभाजी' या मालिकेतदेखील काम केलं आहे. अमोल हे सोशल मीडिया अकाऊंट्सवर त्यांची पत्नी आणि मुलांसोबतचे फोटो पोस्ट करत असतात. त्यांच्या यशात पत्नी भागीदार असल्याचं ते वेळोवेळी या पोस्टमधून निदर्शनास आणतात.