'निर्लज्ज आंटी' म्हणणाऱ्या ट्रोलरला जिनिलियाचं सडेतोड उत्तर, पहा व्हिडीओ

अभिनेता, निर्माता अरबाज खानने Arbaaz Khan 'पिंच' हा नवीन चॅट शो प्रेक्षकांच्या भेटीला आणला आहे. या शोमध्ये तो बॉलिवूडमधल्या नामांकित सेलिब्रिटींना पाहुणे म्हणून बोलावतो आणि त्यांना ट्रोलिंग कल्चरबाबत विविध प्रश्न विचारतो. या शोचा दहावा एपिसोड नुकताच पार पडला असून यामध्ये रितेश देशमुख Riteish Deshmukh आणि त्याची पत्नी जिनिलिया डिसूझा Genelia D'Souza यांनी हजेरी लावली होती. काही दिवसांपूर्वी सोशल मीडियावर रितेश, जिनिलिया आणि प्रिती झिंटा यांचा एका पुरस्कार सोहळ्यातील व्हिडीओ व्हायरल झाला होता. रितेश प्रितीशी बोलत असताना बाजूला उभ्या असलेल्या या व्हिडीओमधील जिनिलियाची प्रतिक्रिया पाहून अनेकांनी त्यावर कमेंट्स केल्या होत्या. काहींनी जिनिलियावर अर्वाच्च भाषेत टिप्पणीसुद्धा केली होती. हे कमेंट्स दाखवत अरबाजने त्याच्या शोमध्ये जिनिलियाला तिची प्रतिक्रिया विचारली.

'निर्लज्ज, असभ्य आंटी नेहमीच ओव्हरअॅक्टिंग करत असते. लग्न झालं असताना, दोन मुलांची आई असताना तुझ्या वयाला आणि चेहऱ्याला अशा पद्धतीचे हावभाव चांगले दिसत नाहीत. तुझी ओव्हरअॅक्टिंग पाहून मुलांनासुद्धा लाज वाटेल', अशा पद्धतीची नेटकऱ्याची कमेंट होती. ही कमेंट वाचून जिनिलियाला धक्काच बसला. ती म्हणाली, "मला नाही वाटत, की त्या व्यक्तीचा तो दिवस चांगला गेला असेल. भाईसाहब, तुम्ही ठीक असाल अशी मी आशा करते. तुम्ही तुमच्या घरी ठीक राहा."

ट्रोलिंगबद्दल रितेशनेही यावेळी त्याचं मत मांडलं. "जर तुम्ही सेलिब्रिटी व्हायचा निर्णय घेत असाल, तर लोकांच्या रोषालाही सामोरं जावं लागेल. त्याबद्दल कोणीही वाईट वाटून घेऊ नये. मी नेहमीच अशा ट्रोलर्ससाठी लिहितो की, मित्रा.. माझं तुझ्यावर प्रेम आहे."

रितेश-जिनिलियाचा जुना व्हिडीओ-

पुरस्कार सोहळ्यातील या व्हिडिओमध्ये रितेश आणि प्रिती झिंटा एकमेकांसोबत गप्पा मारत असतात. या गप्पा जिनिलिया ऐकत असते आणि रितेशकडे रागाने पाहत असते. हा व्हिडिओ सोशल मीडियावर वाऱ्याच्या वेगाने व्हायरल झाला. त्यामधील जिनिलियाच्या हावभावांवरून अनेक मीम्ससुद्धा व्हायरल झाले होते. प्रितीनेही या व्हिडीओवर कमेंट केली होती.

अरबाज खानच्या 'पिंच' या शोमध्ये याआधी सलमान खान, अनन्या पांडे, आयुषमान खुराना, फराह खान, फरहान अख्तर, टायगर श्रॉफ, कियारा अडवाणी या सेलिब्रिटींनी हजेरी लावली होती.