अखेर डान्सिंग क्वीन सपना चौधरी कोर्टाला शरण, फसवणूक चांगलीच भोवली...

Haryana dancer sapna Choudhary: हरयाणाची प्रसिद्ध डान्सर आणि गायिका सपना चौधरीच्या अडचणी वाढतानाच दिसत आहेत. सध्या सपना चौधरीवर फसवणूकीचा गुन्हा दाखल आहे. कोर्टानं सपना विरोधात अजामीनपात्र वॉरंट जारी केलं आहे. याप्रकरणात आता सपना स्वतः कोर्टात दाखल होणार आहे.(Haryana dancer sapna Choudhary can surrender in lucknow court)

हाती आलेल्या नवीन वृत्तानुसार,फसवणूकीच्या प्रकरणात सपना चौधरी कोर्टात स्वतःला सरेंडर करणार आहे. यासाठी तिनं तडक लखनौ गाठलं आहे. सपनाविरोधात कोर्टानं अजामीनपात्र वॉरंट जारी केलं होतं,ज्यानंतर तिच्यावर अटकेची टांगती तलवार लटकत आहे. पण आता सपना स्वतःला सरेंडर करणार असल्याचं म्हटलं जात आहे. लखनौच्या आशियाना पोलिस ठाण्यात सपना चौधरीसोबतच अन्य सात जणांविरोधात फसवणूक केल्या अंतर्गत FIR दाखल करण्यात आली होती.

हे प्रकरण २०१८ सालातली आहे. मिळालेल्या वृत्तानुसार, १३ ऑक्टोबर,२०१८ रोजी दुपारी ३ ते रात्री १० वाजेपर्यंत स्मृती उपवन इथे सपना चौधरीचा कार्यक्रम आयोजित करण्यात आला होता. ज्यासाठी ऑनलाइन आणि ऑफलाइन अशी प्रती ३०० रुपयानं तिकीटविक्री करण्यात आली होती. हा कार्यक्रम पाहण्यासाठी ३०० रुपयाचं तिकीट घेऊन हजारोंच्या संख्येनं लोक उपस्थित होते. पण सपना चौधरी रात्री १० पर्यंत कार्यक्रम स्थळी पोहोचलीच नाही. यामुळे प्रेक्षकांनी खूप हंगामा केला होता. त्यानंतर तिकीटाचे पैसे देखील लोकांना परत दिले गेले नव्हते. आता या प्रकरणासंदर्भातच पुढील चौकशीसाठी सपना चौधरी कोर्टात हजर राहणार आहे.